Елена Сергеева - Блаженная Ксения Петербургская: Жизнь, чудеса, святыни
Икос 4
Слыша о тебе, яко ты, злостражда Христа ради, скорбных утешаеши, немощных укреплявши, заблуждших на путь правый наставляеши, людие страждущия к помощи твоей прибегаху, воспевающе ти сице:
Радуйся, путь Христов всем сердцем возлюбившая:
Радуйся, крест Христов радостно понесшая.
Радуйся, всякое поношение от Mиpa, плоти и диавола претерпевшая:
Радуйся, даров Божиих преисполненная.
Радуйся, любовь небесную к ближним явившая:
Радуйся, страждущим людем утешение подавающая.
Радуйся, слезу плачущих отершая:
Радуйся, благодатию Духа Святаго чудесно согреваемая.
Радуйся, Ксение блаженная, молитвеннице о душах наших.
Кондак 5
Боготечною звездою святость твоя просияла еси, Ксение блаженная, небо осветивши царскаго града: людем бо, в безумии греха погибающим, путь спасения явила еси, к покаянию призывая всех, во еже пети Богу: Аллилуиа.
Икос 5
Видяще подвиги твоя в молитве, терпении хлада и зноя, благочестивыя люди хотяху утишити страдания твоя, одежду и пищу тебе приносяще: ты же вся сия нищим раздавала еси, хотя подвиг свой в тайне сохранити: мы же, дивяся вольней твоей нищете, взываем ти сице:
Радуйся, зной и стужу Христа ради терпевшая добровольце:
Радуйся, непрестанно подвизавшаяся в молитве.
Радуйся, град Петров нощным бдением от бед ограждавшая:
Радуйся, гнев Божий многажды от него отвратившая.
Радуйся, по вся дни и ночи в поле молившаяся Богу:
Радуйся, в нищете духовней вкусившая райскую сладость.
Радуйся, яко от сладости сей вся земная оставившая:
Радуйся, яко вся в Боге пребываеши.
Радуйся, Ксение блаженная, молитвеннице о душах наших.
Кондак 6
Проповедуют святость жития твоего, богоблаженная, вси избавленнии тобою от различных болезней, бед и скорбей, богатии и убозии, старцы и юныя: тем же и мы, прославляюще труды твоя, Богу вопием: Аллилуиа.
Икос 6
Возсияла слава подвигов твоих, блаженная мати, егда ты нощию к строению церкви Смоленской тайно камни носила еси, и подымала еси их на стены храма, облегчая строителем бремя: сия ведуще, и мы, грешнии, зовем ти таковая:
Радуйся, научающая нас тайно творити милостыню:
Радуйся, призывающая нас к подвигом благочестия.
Радуйся, возлюбившая церковную святыню:
Радуйся, строителем храмов Божиих помогающая.
Радуйся, труды наша на пути спасения облегчающая:
Радуйся, к тебе прибегающим скорая помощнице.
Радуйся, всем скорбящим благая утешительнице:
Радуйся, града Петрова небесная заступнице.
Радуйся, Ксение блаженная, молитвеннице о душах наших.
Кондак 7
Хотя избавити от скорби плачущаго врача, жену свою умершую к погребению провождавшаго, ты, о Ксение, повелела еси некоей девице на Охту бежати и тамо мужа себе обрести и утешити: и совершишася тако, якоже ты прорекла еси: они же в радости нежданней воспеша Богу: Аллилуиа.
Икос 7
Новое чудо в молитве твоей показала еси, блаженная мати, егда рекла еси жене благочестивой: «возьми пятак, тут царь на коне, пожар потухнет»: сим прорекла ей о пожаре дома ея: и по молитве твоей пламень огня угасе: мы же, ведяще сия, вопием ти похвальная:
Радуйся, скорби людския угашающая:
Радуйся, дерзновение пред Богом за страждущих явившая.
Радуйся, свече неугасимая, в молитвах к Богу горящая:
Радуйся, предстательнице наша в бедах и напастех.
Радуйся, страстьми одержимых от гибели спасающая:
Радуйся, от брака невернаго отвращающая дев благочестивых.
Радуйся, клеветою уязвленных от отчаяния избавляющая:
Радуйся, на суде неправедном скорая защитнице.
Радуйся, Ксение блаженная, молитвеннице о душах наших.
Кондак 8
Странницею бездомною прошла еси путь жизни, Ксение, в стольнем граде земнаго отечества нашего, в велицем терпении неся скорби и поношения: ныне же в горнем Иерусалиме пребывая, в радости поеши Богу: Аллилуиа.
Икос 8
Всем вся была еси, Ксение блаженная: скорбящим утешение, немощным покров и защищение, печальным радование, нищим одеяние, болящим исцеление, кающимся дверей райских отверзение и споручница к Богу: сего ради и мы, к милосердию твоему прибегая, вопием ти:
Радуйся, пребывающая в горних обителех:
Радуйся, о нас грешных тамо молящаяся.
Радуйся, благий образ явившая служения Богу:
Радуйся, униженных и гонимых покровительнице.
Радуйся, православный люд молитвами твоими заступающая:
Радуйся, обидимых и молящихся тебе защитнице.
Радуйся, обидящих и злых вразумление:
Радуйся, неверных и глумителей посрамление.
Радуйся, Ксение блаженная, молитвеннице о душах наших.
Кондак 9
Всякия болезни претерпела еси, блаженная мати: нищету телесную, глад и жажду, и поношение от людей беззаконных, иже мняху тя быти безумну: ты же, Господу моляся о прощении грешных, выну взывала Ему: Аллилуиа.
Икос 9
Вития многовещанныя не могут разумети, о Ксение, како ты безумием своим Mиpa сего безумие обличила еси, и немощию своею посрамила еси крепкия и мудрыя: не ведят бо в тебе силы Божией и премудрости: мы же, дивящияся ти и помощь твою улучившия, благодарне поем ти таковая:
Радуйся, Божественнаго Духа носительнице:
Радуйся, со апостолом Павлом немощию твоею хвалящаяся.
Радуйся, мнимым безумием твоим Mиp обличившая:
Радуйся, красоту века сего отвергшая ради небеснаго блага.
Радуйся, всем сердцем твоим возлюбившая Христа Бога:
Радуйся, на путь спасения светлый нас призывающая.
Радуйся, во грехе пианства погрязшим обличительнице:
Радуйся, безмездная целительнице и врачу милосердый.
Радуйся, Ксение блаженная, молитвеннице о душах наших.
Кондак 10
Хотя спасти душу свою, блаженная Ксение, ты крест свой взяла и последовала еси Христу Богу, моляся о спасении душ наших: мы же, видяще подвиги твоя, пощение и бдение молитвенное, яко и во плоти твоей показала еси житие безплотных, молим тя: непрестанно молися о нас Спасителю, поминая люди твоя, ко гробу твоему прибегающия, и заступлению твоему верующия: да пребудет с нами Божия милость, да не прогневается благий о гресех наших, и да всем сердцем Богу поем: Аллилуиа.
Икос 10
Стена еси твердая и прибежище необоримое, в житии твоем явилася всем людем, призывающим имя твое, мати Ксение: темже заступай и нас от враг видимых и невидимых молитвами твоими, да зовем ти:
Радуйся, на труд духовный нас воздвизающая:
Радуйся, от сетей вражиих нас избавляющая.
Радуйся, кадильнице, возносящая к Богу благоуханныя молитвы:
Радуйся, миротворице, в сердца людей изливающая мир Божий и исцеление.
Радуйся, дух злобы и ожесточения угашающая любовию:
Радуйся, детям и чистым сердцем подающая благословение.
Радуйся, тайною молитвою от болезней всех исцеляющая:
Радуйся, Mиpy озлобленному мудрость Божию явившая.
Радуйся, Ксение блаженная, молитвеннице о душах наших.
Кондак 11
Пение хвалебное приносят ти, блаженная Ксение, спасшияся молитвами твоими от всяких бед и скорбей, и напастей, и, вкупе с тобою и со всеми святыми, радостно Богу поют: Аллилуиа.
Икос 11
Светом столпа облачного во дни, и огншнаго в нощи, явилося житие твое, святая мати, во мраке жития сего просвещая люди: ты бо падших из тины греха избавила еси и к свету Христову направила еси путь их: темже и мы зовем ти:
Радуйся, православныя люди светом Божиим просвещающая:
Радуйся, угоднице Христова, в миpe надмирно пожившая.
Радуйся, труды многими стяжавшая благодать чудотворения:
Радуйся, во тьме греха благодатию Христовою просиявшая.
Радуйся, отчаявшимся и безнадежным тобою является помощь Божия:
Радуйся, немощных в вере укрепление.
Радуйся, духов злобы посрамление:
Радуйся, житием твоим ангелов удивившая.
Радуйся, Ксение блаженная, молитвеннице о душах наших.
Кондак 12
Благодать обильно источаеши, Ксение блаженная, на чтущих святую память твою, и прибегающих к покрову твоему и заступлению: темже и нам, молящимся ти, зде и повсюду, во градех и весех, источи от Христа Бога исцеления и милости, да всегда зовем Ему: Аллилуиа.
Икос 12
Поюще многая твоя чудеса, блаженная мати, восхваляем тя любовию, и усердно молим тя: не остави нас, грешных и скорбных, в злых обстояниих и в болезнех, помилуй нас, прибегающих к твоему пред Богом предстательству, и умоли Господа сил, да не отпадем от веры православныя, да не забудем Бога нашего, но, блаженная, тобою о Христе утверждаеми, да зовем ти выну:
Радуйся, соґтрадати больным и бедным нас научающая:
Радуйся, немощей наших милостивая врачевательнице.
Радуйся, образе кротости и долготерпения:
Радуйся, о чтущих память твою ходатаице к Богу и покровительнице.
Радуйся, скорбный путь прошедшая и улучившая тем спасение:
Радуйся, любовь Божию являющая верным.
Радуйся, притекающим ко гробу твоему подающая отраду и утешение:
Радуйся, о спасении отечества нашего молящаяся присно.
Радуйся, Ксение блаженная, молитвеннице о душах наших.
