Новый Завет (на цсл., гражданским шрифтом) - Новый Завет

Глава 13

1 В день же той изшед Иисус из дому, седяше при мори.

2 И собрашася к нему народи мнози, якоже ему в корабль влезти и сести: и весь народ на брезе стояше.

3 И глагола им притчами много, глаголя: се, изыде сеяй, да сеет:

4 и сеющу ему, ова падоша при пути, и приидоша птицы и позобаша я:

5 другая же падоша на каменных, идеже не имеяху земли многи, и абие прозябоша, зане не имеяху глубины земли:

6 солнцу же возсиявшу присвянуша, и зане не имеяху корения, изсхоша:

7 другая же падоша в тернии, и взыде терние и подави их:

8 другая же падоша на земли добрей и даяху плод, ово убо сто, ово же шестьдесят, ово же тридесять:

9 имеяй ушы слышати да слышит.

10 И приступивше ученицы (его) рекоша ему: почто притчами глаголеши им?

11 Он же отвещав рече им: яко вам дано есть разумети тайны Царствия небеснаго, онем же не дано есть:

12 иже бо имать, дастся ему и преизбудет (ему): а иже не имать, и еже имать, возмется от него:

13 сего ради в притчах глаголю им, яко видяще не видят, и слышаще не слышат, ни разумеют:

14 и сбывается в них пророчество исаиино, глаголющее: слухом услышите, и не имате разумети: и зряще узрите, и не имате видети:

15 отолсте бо сердце людий сих, и ушима тяжко слышаша, и очи свои смежиша, да не когда узрят очима, и ушима услышат, и сердцем уразумеют, и обратятся, и изцелю их.

16 Ваша же блаженна очеса, яко видят, и уши ваши, яко слышат:

17 аминь бо глаголю вам, яко мнози пророцы и праведницы вожделеша видети, яже видите, и не видеша, и слышати, яже слышите, и не слышаша.

18 Вы же услышите притчу сеющаго:

19 всякому слышащему слово Царствия и не разумевающу, приходит лукавый и восхищает всеянное в сердцы его: сие есть, еже при пути сеянное.

20 А на камени сеянное, сие есть слышай слово и абие с радостию приемлет е:

21 не имать же корене в себе, но привременен есть: бывши же печали или гонению словесе ради, абие соблажняется.

22 А сеянное в тернии, се есть слышай слово, и печаль века сего и лесть богатства подавляет слово, и без плода бывает.

23 А сеянное на добрей земли, се есть слышай слово и разумевая: иже убо плод приносит и творит ово сто, ово же шестьдесят, ово тридесять.

24 Ину притчу предложи им, глаголя: уподобися Царствие небесное человеку, сеявшу доброе семя на селе своем:

25 спящым же человеком, прииде враг его и всея плевелы посреде пшеницы и отиде:

26 егда же прозябе трава и плод сотвори, тогда явишася и плевелие.

27 Пришедше же раби господина, реша ему: господи, не доброе ли семя сеял еси на селе твоем? откуду убо имать плевелы?

28 Он же рече им: враг человек сие сотвори. Раби же реша ему: хощеши ли убо, да шедше исплевем я?

29 Он же рече (им): ни: да не когда восторгающе плевелы, восторгнете купно с ними (и) пшеницу:

30 оставите расти обое купно до жатвы: и во время жатвы реку жателем: соберите первее плевелы и свяжите их в снопы, яко сожещи я: а пшеницу соберите в житницу мою.

31 Ину притчу предложи им, глаголя: подобно есть Царствие небесное зерну горушичну, еже взем человек всея на селе своем,

32 еже малейше убо есть от всех семен: егда же возрастет, более (всех) зелий есть и бывает древо, яко приити птицам небесным и витати на ветвех его.

33 Ину притчу глагола им: подобно есть Царствие небесное квасу, егоже вземши жена скры в сатех триех муки, дондеже вскисоша вся.

34 Сия вся глагола Иисус в притчах народом, и без притчи ничесоже глаголаше к ним:

35 яко да сбудется реченное пророком, глаголющим: отверзу в притчах уста моя: отрыгну сокровенная от сложения мира.

36 Тогда оставль народы, прииде в дом Иисус. И приступиша к нему ученицы его, глаголюще: скажи нам притчу плевел селных.

37 Он же отвещав рече им: сеявый доброе семя есть Сын Человеческий:

38 а село есть мир: доброе же семя, сии суть сынове Царствия, а плевелие суть сынове неприязненнии:

39 а враг всеявый их есть диавол: а жатва кончина века есть: а жатели ангели суть.

40 Якоже убо собирают плевелы и огнем сожигают, тако будет в скончание века сего:

41 послет Сын Человеческий ангелы своя, и соберут от Царствия его вся соблазны и творящих беззаконие

42 и ввергут их в пещь огненну: ту будет плачь и скрежет зубом:

43 тогда праведницы просветятся яко солнце в Царствии Отца их. Имеяй ушы слышати да слышит.

44 Паки подобно есть Царствие небесное сокровищу сокровену на селе, еже обрет человек скры, и от радости его идет, и вся, елика имать, продает, и купует село то.

45 Паки подобно есть Царствие небесное человеку купцу, ищущу добрых бисерей,

46 иже обрет един многоценен бисер, шед продаде вся, елика имяше, и купи его.

47 Паки подобно есть Царствие небесное неводу ввержену в море и от всякаго рода собравшу,

48 иже егда исполнися, извлекоша и на край, и седше избраша добрыя в сосуды, а злыя извергоша вон.

49 Тако будет в скончание века: изыдут ангели, и отлучат злыя от среды праведных,

50 и ввергут их в пещь огненную: ту будет плачь и скрежет зубом.

51 глагола им Иисус: разуместе ли сия вся? Глаголаша ему: ей, Господи.

52 Он же рече им: сего ради всяк книжник, научився Царствию небесному, подобен есть человеку домовиту, иже износит от сокровища своего новая и ветхая.

53 И бысть, егда сконча Иисус притчи сия, прейде оттуду.

54 И пришед во отечествие свое, учаше их на сонмищи их, яко дивитися им и глаголати: откуду сему премудрость сия и силы?

55 не сей ли есть тектонов Сын? не Мати ли его нарицается Мариам, и братия его иаков и иосий, и симон и иуда?

56 и сестры его не вся ли в нас суть? откуду убо сему сия вся?

57 И блажняхуся о нем. Иисус же рече им: несть пророк без чести, токмо во отечествии своем и в дому своем.

58 И не сотвори ту сил многих за неверство их.

Глава 14

1 В то время услыша ирод четвертовластник слух Иисусов

2 и рече отроком своим: сей есть иоанн креститель: той воскресе от мертвых, и сего ради силы деются о нем.

3 Ирод бо емь иоанна, связа его и всади в темницу, иродиады ради жены филиппа брата своего:

4 глаголаше бо ему иоанн: не достоит ти имети ея.

5 И хотящь его убити, убояся народа, зане яко пророка его имеяху.

6 Дню же бывшу рождества иродова, пляса дщи иродиадина посреде и угоди иродови:

7 темже и с клятвою изрече ей дати, егоже аще воспросит.

8 Она же наваждена материю своею, даждь ми, рече, зде на блюде главу иоанна крестителя.

9 И печален бысть царь: клятвы же ради и за возлежащих с ним, повеле дати (ей)

10 и послав усекну иоанна в темнице.

11 И принесоша главу его на блюде и даша девице: и отнесе матери своей.

12 И приступльше ученицы его взяша тело (его) и погребоша е: и пришедше возвестиша Иисусови.

13 И слышав Иисус отиде оттуду в корабли в пусто место един: и слышавше народи по нем идоша пеши от градов.

14 И изшед Иисус виде мног народ, и милосердова о них, и изцели недужныя их.

15 Позде же бывшу, приступиша к нему ученицы его, глаголюще: пусто есть место, и час уже мину: отпусти народы, да шедше в веси купят брашна себе.

16 Иисус же рече им: не требуют отити: дадите им вы ясти.

17 Они же глаголаша ему: не имамы зде токмо пять хлеб и две рыбе.

18 Он же рече: принесите ми их семо.

19 И повелев народом возлещи на траве, и приемь пять хлеб и обе рыбе, воззрев на небо, благослови и преломив даде учеником хлебы, ученицы же народом.

20 И ядоша вси и насытишася: и взяша избытки укрух, дванадесять кошя исполнь:

21 ядущих же бе мужей яко пять тысящ, разве жен и детей.

22 И абие понуди Иисус ученики своя влезти в корабль и варити его на оном полу, дондеже отпустит народы.

23 И отпустив народы, взыде на гору един помолитися: позде же бывшу, един бе ту.

24 Корабль же бе посреде моря влаяся волнами: бе бо противен ветр.