Новый Завет (на цсл., гражданским шрифтом) - Новый Завет

Глава 11

1 И бысть, егда соверши Иисус заповедая обеманадесяте ученикома своима, прейде оттуду учити и проповедати во градех их.

2 Иоанн же слышав во узилищи дела Христова, посла два от ученик своих,

3 рече ему: ты ли еси грядый, или иного чаем?

4 И отвещав Иисус рече има: шедша возвестита иоаннови, яже слышита и видита:

5 слепии прозирают и хромии ходят, прокаженнии очищаются и глусии слышат, мертвии востают и нищии благовествуют:

6 и блажен есть, иже аще не соблазнится о мне.

7 Тема же исходящема, начат Иисус народом глаголати о иоанне: чесо изыдосте в пустыню видети? трость ли ветром колеблему?

8 Но чесо изыдосте видети? человека ли в мягки ризы облеченна? Се, иже мягкая носящии, в домех царских суть.

9 Но чесо изыдосте видети? пророка ли? Ей, глаголю вам, и лишше пророка.

10 Cей бо есть, о немже есть писано: се, аз посылаю ангела моего пред лицем твоим, иже уготовит путь твой пред тобою.

11 Аминь глаголю вам, не воста в рожденных женами болий иоанна крестителя: мний же во Царствии небеснем болий его есть.

12 От дний же иоанна крестителя доселе Царствие небесное нудится, и нуждницы восхищают е:

13 вси бо пророцы и закон до иоанна прорекоша.

14 И аще хощете прияти, той есть илиа хотяй приити:

15 имеяй ушы слышати да слышит.

16 Кому же уподоблю род сей? Подобен есть детем седящым на торжищих, и возглашающым другом своим

17 и глаголющым: пискахом вам, и не плясасте: плакахом вам, и не рыдасте.

18 Прииде бо иоанн ни ядый, ни пияй: и глаголют: беса имать.

19 Прииде Сын Человеческий ядый и пияй: и глаголют: се, человек ядца и винопийца, мытарем друг и грешником. И оправдися премудрость от чад своих.

20 Тогда начат Иисус поношати градовом, в нихже быша множайшыя силы его, зане не покаяшася:

21 горе тебе, хоразине, горе тебе, вифсаидо: яко аще в тире и сидоне быша силы были бывшыя в вас, древле убо во вретищи и пепеле покаялися быша:

22 обаче глаголю вам тиру и сидону отраднее будет в день судный, неже вам.

23 И ты, капернауме, иже до небес вознесыйся, до ада снидеши: зане аще в содомех быша силы были бывшыя в тебе, пребыли убо быша до днешняго дне:

24 обаче глаголю вам, яко земли содомстей отраднее будет в день судный, неже тебе.

25 В то время отвещав Иисус рече: исповедаютися, Отче, Господи небесе и земли, яко утаил еси сия от премудрых и разумных и открыл еси та младенцем:

26 ей, Отче, яко тако бысть благоволение пред тобою.

27 Вся мне предана суть Отцем моим: и никтоже знает Сына, токмо Отец: ни Отца кто знает, токмо Сын, и емуже аще волит Сын открыти.

28 Приидите ко мне вси труждающиися и обремененнии, и аз упокою вы:

29 возмите иго мое на себе и научитеся от мене, яко кроток есмь и смирен сердцем: и обрящете покой душам вашым:

30 иго бо мое благо, и бремя мое легко есть.

Глава 12

1 В то время иде Иисус в субботы сквозе сеяния: ученицы же его взалкаша и начаша востерзати класы и ясти.

2 Фарисее же видевше реша ему: се, ученицы твои творят, егоже не достоит творити в субботу.

3 Он же рече им: несте ли чли, что сотвори давид, егда взалка сам и сущии с ним?

4 како вниде в храм Божий и хлебы предложения снеде, ихже не достойно бе ему ясти, ни сущым с ним, токмо иереем единым?

5 или несте чли в законе, яко в субботы священницы в церкви субботы сквернят и неповинни суть?

6 глаголю же вам, яко церкве боле есть зде:

7 аще ли бысте ведали, что есть: милости хощу, а не жертвы, николиже убо бысте осуждали неповинных:

8 господь бо есть и субботы Сын Человеческий.

9 И прешед оттуду, прииде на сонмище их.

10 И се, человек бе ту, руку имый суху. И вопросиша его, глаголюще: аще достоит в субботы целити? да на него возглаголют.

11 Он же рече им: кто есть от вас человек, иже имать овча едино, и аще впадет сие в субботы в яму, не имет ли е и измет?

12 кольми убо лучши есть человек овчате? темже достоит в субботы добро творити.

13 Тогда глагола человеку: простри руку твою. И простре: и утвердися цела яко другая.

14 Фарисее же шедше совет сотвориша на него, како его погубят. Иисус же разумев отиде оттуду.

15 И по нем идоша народи мнози, и изцели их всех:

16 и запрети им, да не яве его творят:

17 яко да сбудется реченное исаием пророком, глаголющим:

18 се, отрок мой, егоже изволих, возлюбленный мой, наньже благоволи душа моя: положу Дух мой на нем, и суд языком возвестит:

19 не преречет, ни возопиет, ниже услышит кто на распутиих гласа его:

20 трости сокрушенны не преломит и лена внемшася не угасит, дондеже изведет в победу суд:

21 и на имя его языцы уповати имут.

22 Тогда приведоша к нему беснующася слепа и нема: и изцели его, яко слепому и немому глаголати и глядати.

23 И дивляхуся вси народи глаголюще: еда сей есть (Христос) Сын давидов?

24 Фарисее же слышавше реша: сей не изгонит бесы, токмо о веельзевуле князи бесовстем.

25 Ведый же Иисус мысли их, рече им: всякое царство раздельшееся на ся запустеет, и всяк град или дом разделивыйся на ся не станет.

26 И аще сатана сатану изгонит, на ся разделился есть: како убо станет царство его?

27 И аще аз о веельзевуле изгоню бесы, сынове ваши о ком изгонят? сего ради тии вам будут судии.

28 Аще ли же аз о Дусе Божии изгоню бесы, убо постиже на вас Царствие Божие.

29 Или како может кто внити в дом крепкаго и сосуды его расхитити, аще не первее свяжет крепкаго, и тогда дом его расхитит?

30 Иже несть со мною, на мя есть: и иже не собирает со мною, расточает.

31 Сего ради глаголю вам: всяк грех и хула отпустится человеком: а яже на Духа хула не отпустится человеком:

32 и иже аще речет слово на Сына Человеческаго, отпустится ему: а иже речет на Духа святаго, не отпустится ему ни в сей век, ни в будущий.

33 Или сотворите древо добро и плод его добр: или сотворите древо зло и плод его зол: от плода бо древо познано будет.

34 Порождения ехиднова, како можете добро глаголати, зли суще? От избытка бо сердца уста глаголют.

35 Благий человек от благаго сокровища износит благая: и лукавый человек от лукаваго сокровища износит лукавая.

36 глаголю же вам, яко всяко слово праздное, еже аще рекут человецы, воздадят о нем слово в день судный:

37 от словес бо своих оправдишися и от словес своих осудишися.

38 Тогда отвещаша нецыи от книжник и фарисей, глаголюще: учителю, хощем от тебе знамение видети.

39 Он же отвещав рече им: род лукав и прелюбодей знамения ищет, и знамение не дастся ему, токмо знамение ионы пророка:

40 якоже бо бе иона во чреве китове три дни и три нощы, тако будет и Сын Человеческий в сердцы земли три дни и три нощы.

41 Мужие ниневитстии востанут на суд с родом сим и осудят его, яко покаяшася проповедию иониною: и се, боле ионы зде.

42 Царица южская востанет на суд с родом сим и осудит и, яко прииде от конец земли слышати премудрость соломонову: и се, боле соломона зде.

43 Егда же нечистый дух изыдет от человека, преходит сквозе безводная места, ищя покоя, и не обретает:

44 тогда речет: возвращуся в дом мой, отнюдуже изыдох. И пришед обрящет празден, пометен и украшен:

45 тогда идет и поймет с собою седмь иных духов лютейших себе, и вшедше живут ту: и будут последняя человеку тому горша первых. Тако будет и роду сему лукавому.

46 Еще же ему глаголющу к народом, се, Мати (его) и братия его стояху вне, ищуще глаголати ему.

47 Рече же некий ему: се, Мати твоя и братия твоя вне стоят, хотяще глаголати тебе.

48 Он же отвещав рече ко глаголющему ему: кто есть Мати моя, и кто суть братия моя?

49 И простер руку свою на ученики своя, рече: се, Мати моя и братия моя:

50 иже бо аще сотворит волю Отца моего, иже есть на небесех, той брат мой, и сестра, и Мати (ми) есть.