Никон - ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы
Сего ради ниже аз восприемлю, о их же ми писал еси, яко не наказан бысть, о некаянных гресех пещись. Таковая бо, яже повелел еси, показуют и прочих непокаянное.
Аще как толико в неведении или от еже к друг другу прения и прелести бывает, всяко бо древо от своего (л. 196 об.) [733] плода познавается, якоже пишет, обаче убо и в добро и в зло чюжду же ся како и молитву ищеши от инок и от церквей, ничто же достойно творя молитве. И не точию ведаеши им, якоже лепо бе, но и восхищати повелеваеши, словом же точию подаеши, и ничто же странно мирскаго казательства сотвориши.
Мирское бо казательство словом точию имать образы, Божественнаго же Духа казательство делом и истиною кажет. Или не весть власть твоя, яко коегождо молитва коегождо противу бывающему на нем. Сице и усердие имать или в добро или во зло и паче же в немощнейших и неудоспевших во евангельское законо(л. 197)положение [734], глаголющее: Молитеся о напаствующих вас и еже от вземлющаго твоя не истязуй и елика таковая, яже не иноки точию истязует сохранити, но и вас, миряны, и вся купно христианы. И обаче сице рещи имамы, яко иноцы о напаствующих их молящеся себе ползуют. Таковых же, якоже в Божественней лествице, воеже к пастырю слов глаголет, яко не ленись просим и о всяком неприлежнем молитися, не яко да помиловани бедут, себе рече, невозможно есть онем непоспешествующим, но яко да Богом воздвижни будут ко тщанию. Сия бо и елика такова не поношаю аз, окаянный, глаголя, (л. 197 об.) [735] но показати хотя невежество же и прелесть иже по Бозе, добродетели твоей. Се бо якоже видиши во всех и паче в якоже ты князех удержа и паче в похвалу имут прелесть сию.
ВОПРОС, ГЛАВА 20
Имеет ли Государь наш грех, что оставил овдовевшую Церковь Божию?
Ответ
Естли то делает для достойных притчи и обычаем строительским для причин которые нам неведомы, не согрешает и не имеет смертнаго греха, однакож не есть свободен от меншаго греха, для того что многие соблажняются и почитают то дело в ленность, что не радеет и прилежности в том не имеет; а радение болшее царьское есть радение церковное, потому что никогда не укрепляются дела царьския, покамест не укрепятся дела Матери Его Церкви Божии: Мати бо твоя есть, наияснейший царю, Церковь Божия; и как должен ты еси почитати матерь свою, которая тебе родила, так должен еси много паче возлюбить и почитать духовную свою Матерь, которая тебе отродила во святой купели святаго крещения и которая тебе помазала на царьство маслом и харизмою радости.
РАЗОРЕНИЕ 20-го ВОПРОСА И ОТВЕТА
Глаголеши, совопросниче, имеет ли государь наш грех, что оставил овдовевшую Церковь Божию? Изорцы ми прежде, что есть Церковь. Тем же и аз ти реку. Аще ли не веси, вопроси, и аз ти реку, что [736] Церковь есть.
Господу глаголющу: Яко ты еси Петр и на сем камени созижду Церковь мою, и врата адова не удолеют Ей.
Церковь [737] же, глаголю, не место точию, но нрав, не стены церковныя, но законы церко(л. 198)вныя [738]. Церковь бо не стены и покров есть, но вера и житие. Како [739] же ли не одолеша врата адова Церкви, како ли всегда с нами есть Христос, не бо аще не был с нами, одолена бы Церковь. Како Евангелие простреся всюду по вселенней от святых апостол, яко [740] основателем церковным евангельскаго словесе сеятелем, воистину же суть и основания Церкви апостоли.
И [741] стена града имущая 12 оснований и на них 12 имен 12 апостолов Агнчих. Основания же стены, якоже глаголет, блаженнии суть апостоли, на них же Христова Церковь основана бысть, их же имена аки в предписании, и дщицы на сих написана быша ко удобному навыкновению и научению чтущим, (л. 198 об.) [742] стена же велия церковная, высокая же и хранительная сущим во святем граде Христос есть и Глава той же есть.
Что же ли ты, ответотворче, глаголеши неправедно. Естли то делает для достойных притчей и обычаем строительским для причин, которыя нам не ведомы, не согрешает [743] и не имеет смертнаго греха, однако же не есть свободен от меншаго греха для того, что многия соблажняются и почитают то дело в ленности, что не радеет и прилежности в том не имеет. А радение болшое царьское есть радение церковное, потому что никогда не укрепляются дела царьския покамест не укрепятся дела Матери (л. 199) [744] его Церкви Божией. Мати бо есть твоя, наияснейший царю, Церковь Божия и как ты должне еси почитати матерь свою, которая тебя родила, так же должен еси много возлюбити и почитати духовную свою Матерь, которая тебя отродила во святей купели святаго крещения и которая тебя помазала на царьство маслом и харизмою радости.
Слышал еси, ответотворче, к совопроснику твоему, что есть Церковь и что основание Церкви, и что стены и глава. Послушай, прелестниче, Павла апостола законоположника Церкви Божией, да почтет тебе по степенем чин святыя Церкви. И [745] овех убо положи Бог во Церкви, первие апостолы, (л. 199 об.) [746] второе пророки, третие учители, потом же силы, таже дарования исцелением, заступления, исправления, роди языком, еда вси апостоли, еда вси пророцы, еда вси учители, еда вси силы, еда вси дарования имут исцелением, еда вси языки глаголют, еда вси сказуют. Ревнуйте же дарование болших и еще по превосхождению путь вам показую.
Видел ли еси степень святую, почто не именовася царь в первых за высоту царьства. Добро всякому своя мера хранити [747] по писаному: в ней же кто призван, в том да пребывает.
Господу свидетельствующу: Вшед же Царь видети возлежащих, виде (л. 200) [748] человека не оболчена во одеяние брачное и глагола ему: друже, како вниде семо, не имый одеяния брачна? Он же умолче. Тогда рече Царь слугам: Связавше ему руце и нозе, возмите его. И прочая. Мнози бо суть звании, мало же избранных.
Почто вводиши на божественный брак не имущих одеяния брачна? Виде еси грозу Царя, еже рече слугам своим: Связавше ему руце и нозе, возмите его, вверзите его во тму кромешную, ту будет плач и скрежет зубом. И не избавится, избавит ли человек, и не даст Богу измены за ся.
Он [749] же раб, ведый волю Господина своего и не сотворь, ниже уготовлься к хотению Его, биен будет много.
(л. 200 об.) [750] Яко [751] не подобает мнети дар Божий имений или иным неким видом стяжавати.
Видев [752] же Симон, яко возложением рук апостолских дается Дух Святый, принесе им имения, глаголя: Дадите и мне власть, да на него же возложу руце приимет Дух Святый. Петр же рече к нему: Сребро твое с тобою буди в погибель, яко дар Божий мнел еси сребром стяжати. Несть ти части, ни жребия в словеси сем, сердце бо твое несть право пред Богом. Покайся убо о злобе твоей сей и молись Господеви, да оставитися умышление сердца твоего. В желчи бо горести и союзе неправды вижу тя суща. Отвещав же Симон, рече: Помоли(л. 201)теся [753] вы о мне ко Господу, яко да ничтоже найдет на мя, ихже рекосте.
И [754] начаша нецый от скитающихся июдей, обаянник, именовати над имущыя духи лукавыя, имя Господа Иисуса Христа глаголюще: Заклинаем вы Иисусом, Его же Павел проповедает. Бяху же нецыи сынове Скевы июдеанина архиерея седмь, еже се творяше. Отвещав же дух лукавый, рече: Иисуса знаю и Павла свем, вы же кто есте? И скача на них человек, в нем же бе дух лукавый, и одолев им, укрепися на них, якоже нагом и ураненым избежати от храма онаго. Се же все бысть разумно всем живущим во Ефесе июдеом же и еллином, и нападе страх на всех их (л. 201 об.) [755] и величашеся имя Господа Иисуса Христа.
Бывшу [756] же дни молва немала в воинех, что убо Петру бысть, и Ирод же поискав его и не обрет, истязав стражие, повеле отвести их. И изшед от Июдея в Кесарию [757] живяше. В нарочит же день оболкся Ирод во одежду царьску и сед на судищи пред народом, с гордостию глаголаше к ним. Народ же возглашаше глас Божий, а не человеч. Внезапу порази его ангел Господень [758], зане не даде славу Богу, и быв червьми изъяден и издше. И слово Божие растяше и множашеся.
Видел ли еси, ответотворче, страха и грозы полно, до коликих мук осуждает Бог не имущих одеяния брачна (л. 202) [759] и имже не подобает действовати, аще и царь будет, да не действует. Что же ты глаголеши, яко Мати твоя есть, наияснейший царю, Церковь Божия. И как должен ты еси почитати матерь свою, которая тебе родила, также должен еси много возлюбити и почитати духовную свою Матерь, которая тебя отродила в святой купели святаго крещения и которая тебя помазала на царьство елеом и харизмою радости.
И се совершися твое, ответотворче, блядное речение и лжи полное. Откуду ты таковое дерзновение прият, еже на грех толковати, а не от Божественаго писания?
