Никон - ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы
Прелютее того несть, якоже (л. 188 об.) [710] кому гнев царьский понести, якоже бывый во искусе великий Григорий Богослов исповедует. И Соломон премудрый: Ярость царева воистину посол есть смерти, меч язык царев, а не плотян. Мнози тому угождают пред лицем его, всяк же зол бывает в поношение мужеви. Ох, ох, люто приточник глаголет, егда начинаеши со лвом братися, имися крепко, да некако сокрушит и кости твоя. Что прелютее сего, еже исповеда ми некто от враг нашеих, глаголя, что де ты ныне добре кручиноват, ведь де тебе не старая пора. Ныне де нас самех ищут, чтоб на тебя били челом. А кто де ныне не станет (л. 189) [711] бити челом на тебя, и впредь что любо услышит, какое челобитье великий государь и ему де будет жестокое наказание. Я де ныне за неволю одва с постели встав, ехал по государеву указу, или что государь во все Московское государство изволил послати грамоты по монастырем архимандритом и игуменом, что бутто я имал, будучи на патриаршестве при бытии своем, потребы монастырския, казну, хлеб, лошади, вотчины на мену в цену и без цены. И после отходу своего имал вотчины на мену в цену и без цены. И церковных и казенных и вотчинных потреб и хлеба и (л. 189 об.) [712] лошадей и вотчин и судов серебряных и золотых и книг и инаго чего, и сколко четвертей, и кто тот хлеб и куды к нему возили, и в котором году и месяце, и при которых властех. И о том о всем бы к нему, великому государю, подлинно порознь и по статьям и скаски и росписи за своима рукама присылать с нарочным добрым старцом или слугою без всякаго мотчания и прочее.
А о себе не изволил великий государь праведно разсмотрить, колико у святей велицей церкви Пресвятыя Богородицы поимал вотчин, людей и прочих всех домовных потреб, хлеба, рыбы, денег, ло(л. 190)шадей [713] и прочих потреб вместо великаго дароношения за помазание на царьство. Такожде и от прочих святых церквей и монастырей поимано елико вотчин и людей и денег и хлеба и лошадей, и кто может исчислить. А ему, великому государю, святая великая соборная апостолская Церковь и прочия святыя церкви и святыя монастыри ничем не повинны и никакими данми, развее по завещанию святых апостол молитвою и честию, якоже Павел апостол учит.
Молю [714], убо прежде всех творити молитвы моления, прошения, благодарения за вся человеки, за царя и за вся, иже во власти суть, да тихо и безмолвно житие поживем во всяком (л. 190 об.) [715] благоверии и чистоте. Се бо доброй приятно пред Спасителем нашим Богом, иже всем человеком хощет спастися и в разум истины приити.
И [716] верховный апостол Петр царя чтити повелевает. А еже о истине кто аще и царю глаголет, не подобает ему гневатися, или отмщати самому себе, или обидети по 84-му правилу святых апостол, ведяще, яко и тому есть Господь на небеси.
Возложеная же Господеви в церковь или в монастырь по 73-му правилу святых апостол и святаго 4-го собора Вселенскаго по 24-му правилу.
Монастырь с волею епископа поставлен, да пребывает не претворен, и яже суть к нему имения, да будут неотъемлема. (л. 191) [717] Аще же кто инако начнет творити, несть без вины.
Толкование.
Монастыри, иже без благословения и без повеления создани быша, не создани суть, ни освящени. Повелением же и со благословением епископа создани монастыри, яко Божественая места и Богу поручени суще, да пребывают не претворени и не обидими во веки, и мирская жилища николи же да не будут в них. Да сохраняют же имения их и стяжания, села и винограды и вся прочая, неотъемлема и неотходна от них. Аще кто преступит повеление сие, от правил запрещения да будут повинни.
Такожде и 6-го Вселенскаго собора правило 49-е, собора первовтораго правило 1-е и 2-е (л. 191 об.) [718] и седмаго Вселенскаго собора 12 правило, и Кирилла архиепископа Александрийскаго правило 2-е. Сия же святая правила не повелевают что любо от святых церквей и святых монастырей отнимати или имати и в мирская жилища притворяти или на мирская растакати, якоже и Господь утвержает, Божия [719] Богови отдати и кесарева кесарю. Остави, рече, да первие насытятся чада, несть бо добро отъяти хлеба чадом и поврещи псом. И не дадите, рече, святая псом.
По правилом же святых апостол.
Правило 38. Да управляет епископ властелски церковное имение и ничто же от него сродником своим да не даст, аще токмо не суть убози.
(л. 192) [720] Толкование.
Не подобает епископа разсуждати о правлении церковнаго имения, достойно бо ему есть властию таковое правити, яко пред лицем самаго Бога. Не достоит же ему от таковых что свое особно сотворити, ни ближним своим Божия дому раздавати. Аще же суть убози, да подает им потребная, яко и прочим нищим. Изветом же тех церковнаго имения ничто же да не продаст.
Правило 41.
Повелевает же епископом обладати церковным имением, аще бо честныя человеческия души поручены суть им, болми паче имение поручити им подобает, яко да по сих власти все управляют (л. 192 об.) [721] и убогим требование подают рукама четсных презвитер и диакон со страхом Божиим и благоговением. Подобает же и тому самому, аще требует, взимати себе на нужную потребу, еже хощет, и приходящую странную братию гостити и кормити и ничто же потребнаго не лишити их. Ибо [722] закон Божий повелевает служащим олтареви от олтаря кормитися, понеже [723] ни воинник не может о своем имении оружия нанести на противнаго.
Толкование.
Аще и во области даются церковныя имения, но не о себе самому сия управляти, но сведением и по совету презвитер и диакон своих таковая строити (л. 193) [724] повелевают бо действенная правила и яко нуждныя потребы токмо подобно есть себе взимати епископом от церковнаго имения.
Собора иже во Антиохии правило 25.
Епископ [725] господин есть церковному имению. Аще же не довлеет ему, еже вземлет на свою потребу, но имение церковное и селныя плоды и богатство, еже сходится во епископию, вземлет и свое творит без ведения и без воли причетник своих, да воздаст ответ один пред всем собором. Аще же и яже суть подобна нищим раздавати да воздаст ответ пред всем собором.
Толкование.
Ему же честныя душы (л. 193 об.) [726] человеческия поручены суть, болми тогда имать власть над церковным имением, якоже да раздавает то требующим руками презвитер и диакон церковных. Взимати же и себе, аще скуден есть, подобная на нуждную потребу и на восприятие братии и гостей приходящих к нему, да не лишени будут пищи и странноприимства. Аще же не досыти ему в потребных, но сходящияся потребы церковныя и селныя плоды хощет взяти и свою сотворити, и того ради иконома церковнаго своего сродника поставив, яже да утаится егда раздавает церковное имение, о сем от собора суд да приимет, якоже (л. 194) [727] епископи испытуют. А еже бы царю обладати властелски церковным имением или монастырями, нигде же обретается. А иже кто презорством и владети начнет святыми церквами или монастыри или церковными и монастырскими вещми, движимыми или недвижимыми, и того ради гнев Божий бывает на него и на все царьство его.
Якоже пишет святый Никон 2-е книги своей в 23 слове, еже писа к магистру и князю князем Марине: О еже не быти подобно церковная и монастырская и иноческая мирским князем на своя потребы истощевати, елма и святотатства грехом осуждаются.
(л. 194 об.) [728] Чюжду же ся иже по Бозе разуму твоему и благочестию, како утаитися и толико прииде в забвение писания, его же ти послах. Обаче не хотящу ми, но со многою нуждею послах спасения ради твоего, зане веси како рекл ми сеи, егда бе зде, глаголя, яко должен еси поучати мя. И аз убо на том есмь новослышащих. И сего ради писах ти поспевающая во спасение твое, души купно и телу и всему дому твоему. Приложих же тамо и се, яко аще сия сохраниши, паки реку ти ина. Аще ли не сохраниши сия, умолчю и аз, не глаголати тебе. И обаче яко ничто же сохранил еси от них, весть власть твоя, елика подъят, (л. 195) [729] лютая и бысть на тебе скорбь велика, яко в мале убо и к смерти. Аще не бы Господь сохранил тя, и к сии истинное подаяние твое, обаче не на тебе единем, но и всему дому твоему толика скорбь пройде, и во всем твоем возлюбленнем сродстве и во других. Сице бывает, увы мне, на преобидящих слово Божие. И ныне се глаголет ти, яко здрав бысть, к тому не согрешай, да не горее ти что будет. Аз же на се смотрях и не писах тебе, но поне отныне потщися плод некий истиннаго покаяния показати и якоже надеюся, убо явленая ничто же вижду, обаче всем, церковная бо и монастырьская и иноческая и [730] (л. 195 об.) [731] дела их вся Богови суть освящена и на ино что не расточаются, разве на убогия и странныя и пленныя и елика такова подобне и на вся иноческая же и монастырьская и церковныя потребы. Князь же некий даже до самаго настоящаго не имам рещи, аще что о сих во своя потребы, яко святотатец от Богу судится и святотатства осуждением осуждается Божествеными правилы в ныняшнем и в будущем веце. И да испытает власть твоя Божественыя писания и обрящеши не толико точию раздражати сему Бога и толику беду и муку имети, но идеже аще внидут таковая по власти или пристрастия или в княжеская или (л. 196) [732] в сродства и елика такова, огнь бывают и изжжут. И яже от инех различных собрания прибыток и понеже паки таковая повелел еси собирати церковная и монастырьская и иноческая и дела их и плоды, яже Богови возложеная, на свою потребу и дома своего и прочих, иже лихоимством недугующих, и паки изволил еси приражатися Богу.
