Павел Михалицын - Первая книга православного верующего

Помимо молитвы Господней в Православной Церкви существует огромное множество различных молитв и молитвенных последований. Составлены они в разное время и по различным случаям, в основном святыми отцами, которые были вдоховлены на это Святым Духом. Среди них есть молитвы просительные, покаянные, хвалебные, славословные, радостные и грустные, но всех их объединяет любовь к Богу и Его святым угодникам. Таким образом, вся эта совокупность молитвенного наследия Церкви являет многовековую традицию общения человеческой души со своим Творцом. Святая Православная Церковь, как любящая мать, учит нас как, когда и кому необходимо возносить свои молитвы.

Молитвы об исцелении от телесных недугов

Молитва перед иконой Божией Матери «Целительница»

(Празднование 1 октября)

Приим́и, о Всеблагослове́нная и Всемо́щная Госпоже́ Влады́чице Богоро́дице Де́во, печа́льныя сия́ моли́твы, со слеза́ми Тебе́ приноси́мыя от нас, недосто́йных рабо́в Твои́х, к Твоему́ цельбоно́сному о́бразу пе́ние возсыла́ющих со умиле́нием, я́ко Тебе́ Само́й су́щей и прислу́шающей моле́ния на́ша и подаю́щей с ве́рою прося́щим. По коему́ждо бо проше́нию исполне́ние твори́ши, ско́рби облегча́еши, не́мощным здра́вие да́руеши, рассла́бленных и неду́жных исцеля́еши, от бе́сных бе́сы прогоня́еши, оби́димыя от бед избавля́еши, прокаже́нных очища́еши и ма́лых дете́й ми́луеши, еще́ же Госпоже́ Влады́чице Богоро́дице, от уз и темни́цы свобожда́еши и вся́кия многоразли́чныя стра́сти врачу́еши: вся бо суть возмо́жна хода́тайством Твои́м к Сы́ну Твоему́ Христу́ Бо́гу на́шему. О Всепе́тая Ма́ти, Пресвята́я Богоро́дице! Не преста́й моли́тися о нас, недосто́йных рабе́х Твои́х, сла́вящих Тя и почита́ющих Тя, и поклоня́ющихся со умиле́нием пречи́стому о́бразу Твоему́, и наде́жду иму́щих невозвра́тну и ве́ру несумне́нну к Тебе́ Присноде́ве Пресла́вней и Непоро́чней, сла́вящих и чту́щих Тя и вопию́щих во ве́ки веко́в. Ами́нь.

Молитвы о помощи в душевных немощах

Молитва перед иконой Божией Матери «Скоропослушница»

(Празднование 22 ноября)

Преблагослове́нная Влады́чице, Присноде́во Богоро́дице, Бо́га Сло́ва па́че вся́каго сло́ва на спасе́ние на́ше ро́ждшая, и благода́ть Его́ преизоби́льно па́че всех прия́вшая, мо́ре я́вльшаяся Боже́ственных дарова́ний и чуде́с приснотеку́щая река́, излива́ющая бла́гость всем, с ве́рою к Тебе́ прибега́ющим! Чудотво́рному Твоему́ о́бразу припада́юще, мо́лимся Тебе́, Всеще́дрей Ма́тери Человеколюби́ваго Влады́ки: удиви́ на нас пребога́тыя ми́лости Твоя́, и проше́ния на́ша, приноси́мая Тебе́, Скоропослу́шнице, ускори́ испо́лнити, все, е́же на по́льзу во утеше́ние и спасе́ние коему́ждо устроя́ющи. Посети́, Преблага́я, рабы́ Твоя́ благода́тию Твое́ю, пода́ждь неду́гующим цельбу́ и соверше́нное здра́вие, обурева́емым тишину́, плене́нным свобо́ду и разли́чными о́бразы стра́ждущих уте́ши, изба́ви, Всеми́лостивая Госпоже́, всяк град и страну́ от гла́да, я́звы, тру́са, пото́па, огня́, меча́ и ины́я ка́зни вре́менныя и ве́чныя, ма́терним Твои́м дерзнове́нием отвраща́ющи гнев Бо́жий: и душе́внаго разслабле́ния, обурева́ния страсте́й и грехопаде́ний свободи́ рабы́ Твоя́, я́ко да непреткнове́нно во вся́ком благоче́стии пожи́вше в сем ве́це, и в бу́дущем ве́чных благ сподо́бимся благода́тию и человеколю́бием Сы́на Твоего́ и Бо́га, Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м и Пресвяты́м Ду́хом, ны́не и при́сно и во ве́ки веко́в. Ами́нь.

О Пресвята́я Де́во, Ма́ти Го́спода Вы́шняго, Скоропослу́шная Засту́пнице всех, к Тебе́ с ве́рою прибега́ющих! При́зри с высоты́ небе́снаго вели́чия Своего́ на мене́ непотре́бнаго, припада́ющаго к ико́не Твое́й, услы́ши ско́ро смире́нную моли́тву мене́ гре́шнаго и принеси́ ю к Сы́ну Своему́: умоли́ Его́, да озари́т мра́чную ду́шу мою́ све́том Боже́ственныя благода́ти Своея́ и очи́стит ум мой от по́мыслов су́етных, да успоко́ит стра́ждущее мое́ се́рдце и исцели́т ра́ны его́, да вразуми́т мя на до́брая дела́ и укрепи́т рабо́тати Ему́ со стра́хом, да прости́т вся соде́янная мно́ю зла́я, да изба́вит ве́чныя му́ки и не лиши́т Небе́снаго Своего́ Ца́рствия. О Преблагослове́нная Богоро́дице, Ты благоизво́лила еси́ нарещи́ся во о́бразе Свое́м Скоропослу́шница, повелева́ющи всем притека́ти к Тебе́ с ве́рою: не пре́зри у́бо мене́ ско́рбнаго и не попусти́ поги́бнути мне в бе́здне грехо́в мои́х. На Тя по Бо́зе все мое́ упова́ние и наде́жда спасе́ния, и Твоему́ покро́ву и предста́тельству поруча́ю себе́ во ве́ки. Ами́нь.

Молитвы о благосостоянии Отечества и Церкви

Молитва Архистратигу Божию Михаилу и прочим Небесным Силам бесплотным

(Празднование 21 ноября)

К вам, я́ко засту́пником и храни́телем жи́зни моея́, аз окая́нный припада́я, молю́ся: подади́те мне моли́твами ва́шими, дневно́е пребыва́ние богоуго́дно и неиску́сно от злых дея́ний и помышле́ний прейти́. Отве́рзите слух у́шию мое́ю, да услы́шу и разуме́ю дела́ и словеса́ Бо́жия душеполе́зная, да прозрю́ вну́треннима очи́ма, тьмо́ю грехо́вною одержи́мый. Моли́те за мя, по вся часы́ согреша́ющаго, да не поя́ст мене́ меч я́рости Госпо́дни: зело́ бо превзыдо́ша беззако́ния моя́ на главу́ мою́, и я́ко бре́мя тя́жкое отяготе́ша на мне. Ты же, Го́споди мой, Го́споди, при́зри на мя и поми́луй мя, и изведи́ из темни́цы грехо́вныя ду́шу мою́, пре́жде да́же не отиду́ отсю́ду и не прииду́ на Стра́шный о́ный Суд Твой. Приими́ моля́щияся за ны святы́я А́нгелы Твоя́, и́же окре́ст Престо́ла Твоего́ всегда́ со стра́хом предстоя́т, и тех моли́твами, изря́днее же Пречи́стыя Твоея́ Ма́тере, изба́ви мя от Стра́шнаго о́наго и Гро́знаго Суда́ Твоего́: Ты бо еси́ А́гнец Бо́жий, взе́мляй всего́ ми́ра грехи́, распя́тый на Кресте́ на́шего ра́ди спасе́ния. Вонми́ моли́тве мое́й, и посли́ А́нгела-храни́теля души́ мое́й и те́лу, да тем наставля́емь, изба́влюся от вся́ких враго́в ви́димых и неви́димых и сподо́блюся получи́ти Твою́ ми́лость со все́ми от ве́ка Тебе́ благоугодившими: я́ко Ты еси́ Бог наш, и к Тебе́ прибега́ю, и на Тя наде́юся: а́ще и согреши́х па́че челове́к, но от Тебе́ не отступи́х, ни руку́ мое́ю возде́х ко ино́му бо́гу. Тебе́ молю́ся, Го́споди Иису́се Христе́, Тя благословлю́, и Тебе́ покланя́юся от Тро́ицы Еди́ному, со Отце́м и Святы́м Ду́хом, ны́не и при́сно и во ве́ки веко́в. Ами́нь.

Молитвы в семейных нуждах

Молитва перед иконой Божией Матери «Тихвинская»

(Празднование 9 июля)

О Пресвята́я Де́во, Ма́ти Го́спода Вы́шних Сил, небесе́ и земли́ Цари́це, гра́да и страны́ на́шея Всемо́щная Засту́пнице! Приими́ хвале́бно-благода́рственное пе́ние сие́ от нас, недосто́йных раб Твои́х, и вознеси́ моли́твы на́ша ко Престо́лу Бо́га Сы́на Твоего́, да ми́лостив бу́дет непра́вдам на́шим и проба́вит бла́гость Свою́ чту́щим всечестно́е и́мя Твое́ и с ве́рою и любо́вию покланя́ющимся чудотво́рному о́бразу Твоему́. Не́смы бо досто́йни от Него́ поми́ловани бы́ти, а́ще не Ты уми́лостививши Его́ о нас, Влады́чице, я́ко вся Тебе́ от Него́ возмо́жна суть. Сего́ ра́ди к Тебе́ прибега́ем, я́ко к несомне́нней и ско́рой Засту́пнице на́шей: услы́ши нас, моля́щихся Тебе́, осени́ нас вседержа́вным покро́вом Твои́м и испроси́ у Бо́га Сы́на Твоего́ па́стырем на́шим ре́вность и бде́ние о душа́х, градоправи́телем му́дрость и си́лу, судия́м пра́вду и нелицеприя́тие, наста́вником ра́зум и смиренному́дрие, супру́гам любо́вь и согла́сие, ча́дам послуша́ние, оби́димым терпе́ние, оби́дящим страх Бо́жий, скорбя́щим благоду́шие, ра́дующимся воздержа́ние: всем же нам дух ра́зума и благоче́стия, дух милосе́рдия и кро́тости, дух чистоты́ и пра́вды. Ей, Госпоже́ Пресвята́я, умилосе́рдися на не́мощныя лю́ди Твоя́: разсе́янныя собери́, заблу́ждшия на путь пра́вый наста́ви, ста́рость поддержи́, ю́ныя уцелому́дри, младе́нцы воспита́й, и при́зри на всех нас призре́нием ми́лостиваго Твоего́ заступле́ния, воздви́гни нас из глубины́ грехо́вныя и просвети́ серде́чныя о́чи на́ша к зре́нию спасе́ния, ми́лостива нам бу́ди зде и та́мо, в стране́ земна́го прише́льствия и на Стра́шнем Суде́ Сы́на Твоего́: преста́вльшиися же в ве́ре и покая́нии от жития́ сего́ отцы́ и бра́тию на́шу в ве́чней жи́зни со А́нгелы и со все́ми святы́ми жи́ти сотвори́. Ты бо еси́, Госпоже́, сла́ва небе́сных и упова́ние земны́х, Ты по Бо́зе на́ша Наде́жда и Засту́пница всех притека́ющих к Тебе́ с ве́рою. К Тебе́ у́бо мо́лимся, и Тебе́, я́ко Всемогу́щей Помо́щнице, са́ми себе́ и друг дру́га и весь живо́т наш предае́м, ны́не и при́сно и во ве́ки веко́в. Ами́нь.

Молитвы о помощи в труде

Молитва святому великомученику Георгию Победоносцу

(Празднование 6 мая, 16 и 23 ноября, 9 декабря)