Древнерусская литература. Библиотека русской классики. Том 1 - Коллектив авторов
По сему разумевай того ж Дионисия о истинне: «Себе бо отвержение — истинны испадение; истинна бо сущее есть; а ще бо истинна сущее есть, истинны испадение сущаго отвержение есть. От сущаго же Бог испасти не может и еже не быти — несть».
Мы же речем: потеряли новолюбцы[384] существо Божие испадением от истиннаго Господа Святаго и животворящаго Духа. По Дионисию, коли уж истинны испали, тут и сущаго отверглись. Бог же от существа Своего испасти не может, и еже не быти — несть того в Нем: присносущен истинный Бог наш. Лучше бы им в символе веры не глаголати «Господа», виновнаго имени, а нежели «истиннаго» отсекати[385], в нем же существо Божие содержится. Мы ж, правовернии, обоя имена исповедуем и в Духа Святаго, Господа истиннаго и животворящаго, света нашего, веруем, со Отцем и с Сыном поклоняемаго, за него же стражем и умираем помощию Его Владычнею.
Тешит нас той ж Дионисий Ареопагит, в книге ево писано: «Сей убо есть воистинну истинный християнин, зане[386] истинною разумев Христа и тем богоразумие стяжав, исступив убо себе, не сыи в мирском их нраве и прелести, себя же весть трезвящеся и изменена всякаго прелестнаго неверия, не токмо даже до смерти бедъствующе истинны ради, но и неведением скончевающеся всегда, разумом же живуще, и християне суть свидетельствуемы».
Сей Дионисий научен вере Христове от Павла-апостола, живыи во Афинех, прежде, даже не приити в веру Христову, хитрость имыи исчитати беги небесныя; егда ж верова Христови, вся сия вмених быти яко уметы. К Тимофею пишет в книге своей сице глаголя: «Дитя, али не разумеешь, яко вся сия внешняя блядь ничто ж суть, но токмо прелесть, и тля, и пагуба. Аз проидох делом и ничто ж обретох, токмо тщету».
Чтыи да разумееть. Ищитати беги небесныя любят погибающий, понеже любви истинныя не прията, во еже спастися им, и сего ради послеть им Бог действо льсти, во еже веровати им лжи, да суд приимут не веровавшии истинне, но благоволиша о неправде. Чти о сем Апостол, 275.
Сей Дионисий, еще не приидох в веру Христову, со учеником своим во время распятия Господня быв в Солнечней граде и виде: солнце во тьму преложися и луна в кровь, звезды в полудне на небеси явилися черным видом. Он же ко ученику глагола: «Или кончина веку прииде, или Бог Слово плотию стражет», — понеже не по обычаю тварь виде изменену. И сего ради бысть в недоумении. Той ж Дионисий пишет о солнечном знамении, когда затмится: «Есть на небеси пять звезд заблудных[387], еже именуются луны. Сии луны Бог положил не в пределех, якоже и прочии звезды, но обтекают по всему небу, знамение творя или во гнев, или в милость. Егда заблудница, еже есть луна, подтечет от запада под солнце и закроет свет солнечный, и то затмение солнцу за гнев Божий к людям бывает. Егда ж бывает от востока луна подтекает, и то, по обычаю шествие творяще, закрывает солнце».
А в нашей Росии бысть затмение солнцу в 162 году пред мором[388]. Плыл Волгою-рекою архиепископ Симеон Сибирской, и в полудне тма бысть перед Петровым днем недели за две; часа с три плачючи у берега стояли. Солнце померче, от запада луна подтекала, являя Бог гнев свой к людям. В то время Никон-отступник веру казил и законы церковныя, и сего ради Бог излиял фиял[389] гнева ярости Своея на Русскую землю: зело мор велик был, неколи еще забыть, вси помним. Паки потом, минув годов с четырнатцеть, вдругоряд затмение солнцу было: в Петров пост, в пяток, в час шестым тма бысть, солнце померче, луна от запада же подтекала, гнев Божий являя. Протопопа Аввакума, беднова горемыку, в то время с прочими в соборной церкви власти остригли и на Угреше в темницу, проклинав, бросили.
Верный да разумеет, что делается в земли нашей за нестроение церковное и разорение веры и закона. Говорить о том престанем, в день века познано будет всеми, потерпим до тех мест.
Той ж Дионисий пишет о знамении солнца, како бысть при Исусе Наввине во Израили. Егда Исус секии иноплеменники и бысть солнце противо Гаваона, еже есть на полднях, ста Исус крестообразно, сиречь разпростре руце свои, и ста солнечное течение, дондеже враги погуби. Возвратилося солнце к востоку, сиречь назад отбежало, и паки потече, и бысть во дни том и в нощи тритцеть четыре часа, понеже в десятый час назад отбежало, так в сутках десеть часов прибыло. И при Езекии-царе бысть знамение: оттече солнце назад во вторый на десеть час дня, и бысть во дни и в нощи тридесять шесть часов. Чти книгу Дионисиеву, там пространно уразумеешь.
Он же, Дионисий, пишет о небесных силах, возвещая, како хвалу приносят Богу, разделяяся деветь чинов на три троицы. Престоли, херувими и серафими, освящение от Бога приемля, сице восклицают: «Благословена слава от места Господня!» И чрез их преходит освящение на вторую троицу, еже есть господьства, начала, власти. Сия троица, славословя Бога, восклицают: «Аллилуия, аллилуия, аллилуия!» По Алфавиту[390], «аль» — Отцу, «иль» — Сыну, «уия» — Духу Святому. Григорий Низский толкует: «Аллилуия — хвала Богу», а Василий Великий пишет: «Аллилуия — ангельская речь, человечески рещи — слава Тебе, Боже». До Василия пояху во церкви ангельския речи: «Аллилуия, аллилуия, аллилуия!» Егда же бысть Василий, и повеле пети две ангельския речи, а третьюю — человеческую, сице: «Аллилуия, аллилуия, слава Тебе, Боже». У святых согласно — у Дионисия и у Василия: трижды воспевающе, со ангелы славим Бога, а не четыржи по римской бляди; мерско Богу четверичное поспевание сицевое: «Аллилуия, аллилуия, аллилуия, слава Тебе, Боже». Да будет проклят сице поюще с Никоном и с костелом римским! Паки на первое возвратимся. Третьяя троица: силы, архангели, ангели. Чрез среднюю троицу освящение приемля, поют: «Свят, свят, свят Господь Саваоф, исполнь небо и земля славы Его». Зри: тричислено и се воспевание. Пространно Пречистая Богородица протолковала о аллилуии, явилась Василию[391], ученику Ефросина Псковскаго. Велика во «аллилуии» хвала Богу, а от зломудрствующих досада велика: по-римски Троицу Святую в четверицу глаголют, Духу и от Сына исхождение являют. Зло и проклято се мудрование Богом и святыми! Правоверных избави, Боже, сего начинания злаго о Христе Исусе, Господе нашем, ему же слава ныне и присно и во веки веком. Аминь.
Афонасий Великий рече: «Иже хощет спастися, прежде всех подобает ему держати кафолическая вера, ея же аще кто целы и непорочны не соблюдают, кроме всякого недоумения, во веки погибнет. Вера же кафолическая сия есть, да единаго Бога в Троице и Троицу во единице почитаем, ниже сливающе составы, ниже существо разделяюще. Ин бо есть состав Отечь, ин — Сыновей, ин — Святаго Духа, но Отчее, и Сыновнее, и Святаго Духа едино Божество, равна слава, соприсносущно величество; яков Отец, таков Сын, таков и Дух Святой: вечен Отец, вечен Сын, вечен и Дух Святый; не создан Отец, не создан Сын, не создан и Дух Святый, Бог-Отец, Бог-Сын, Бог — и Дух Святый». Не три Бози, но един Бог, не три несозданнии, но един несозданный; равне: Вседержитель-Отец, Вседержитель-Сын, Вседержитель — и Дух Святый; подобне: непостижим Отец, непостижим Сын, непостижим и Дух Святый; не три Вседержители, но един Вседержитель, един непостижимый. И в сей Святей Троице ничто же первое или последнее, ничто ж более или мнее, но целы три составы и соприсносущны суть себе и равны. Особно бо есть Отцу нерождение, Сыну же рождение, а Духу Святому исхождение; обще же им Божество и царство.
Нужно бо есть побеседовати и о вочеловечении Бога-Слова к вашему спасению. За благость щедрот излия Себе от Отеческих недр Сын, Слово Божие, в Деву чисту Богоотроковицу, егда время наставало, и воплотився от Духа Свята и Марии-Девы вочеловечився, нас ради пострадал, и воскресе в третий день, и на небо вознесеся, и седе одесную величествия на высоких, и хощеть паки прийти судити и воздати комуждо по делом его, Его же царствию несть конца.
