Георгий Задонский - Различные записки и выписки
5. Ум прельщаемый исправляет чтение, бдение и молитва. Похоть же жегомую иссушает алчба, труд и отшельничество. Ярость же возмущающую укрощает псалмопение, долготерпение и милость. Безмерная бо и безвременная маловременна суть, паче вредна и неполезна.
Из главизн Исихия пресвитера.
76. Созерцалище учения всякия добродетели есть блюдение ума.
77. Якоже чувственно вредная зряще, повреждаемся: сице и зряще умом.
81. Ученолюбив сый, буди и трудолюбив. Высокий бо разум надмевает человека.
84. Якоже бо свету не сущу, мрачна и темна вся: сице не сущу смиренномудрию, все наши тщанья по Бозе суетны и бесполезны.
17. Евагрия монаха, о подвижничестве и безмолвии.
Пс. 54, 23. 1 Петр. 5, 7. Возверзи на Господа паче печаль твою, и той о тебе промыслит. Той бо, глаголется, печется о вас. Аще бы потребно было ястий, или одежд, но усрамися от других ти приносимая прияти: сие бо есть гордости вид. Аще же и сам в сих избыточествуеши, даждь лишающемуся. Тако Бог чадом своим удомостроятися хощет. Имея убо подобающая для настоящего времени, да не печешися о будущем времени; подаст оно подобающая, ищущу ти наипаче царствия небесного и правды Божия. Ищите бо, глаголет Господь, царствия Божия и правды его, и сия вся приложатся вам. Образ безмолвия стяжевай. Не люби жити с людьми веществолюбивыми и злоодержимыми; или един живи, или со братьями невеществолюбивыми и единомудренными. С людьми бо веществолюбивыми и злообдержимыми живущий, всяко приобщится и сам злообстоянию их, и поработает человеческим повелениям и беседам суетным и иным всем лютым: гневу, печали, неистовым делом, страшным соблазном и прочим таковым злообстоятельствам. Аще же и келлия, в ней же седиши, удобообдержима молвою будет; бежи и еяе не щади, да не ослабееши по любви к ней. Вся твори, вся чини, да кого возможеши безмолвствовати, и безпопечителен быти, и тщится пребывати в воли Божьей, и во брани с невидимыми. Пребываний во граде убегай, и пустынныя терпи. Пс. 54, 8. Се бо, глаголет Святый Давид: удалихся бегая, и водворихся в пустыни. И паки глаголет: видех беззаконие и пререкание во граде. Безмолвных убо и уединенных ищи мест. Не устрашися гласа сих, аще бы и бесовские мечтания тамо увидел ты, не бойся, ниже да убежиши от поприща своей пользы. Безбоязненно претерпи, и узриши величия Божия: заступление, промысл и всякое иное извещение о спасении. Чаях бо спасающаго мя от малодушия и от бури. Пс. 54, 9. Да не победит парящая похоть произволение твое; парение бо похоти пременяет ум незлобив. Ерем. 4, 12. Многия сего рода бывают искушенья. Бойся согрешения, и в келлии твоей тверд буди.
18. Святого Григория Синаита главы зело полезныя.
1. Всяк крестивыйся во Христа, должен есть доспети всех о Христе превозвращений; предприял бо есть сих силу, и посредством заповедей обрести сия и навыкнути может. Зачатие убо есть обручение духа; рождение же—действо радования; крещение же — чистительного духовного огня сила; преображение же—божественного света видение; распятие же—еже от всех умерщвление, погребение — хранение в сердце божественного рачения; воскресение — животворное души восстание; вознесение же—еже к Богу исступление и восхищение ума. Не обретши же сия и неощутивший — младенец еще есть и телом и духом, аще и сед есть, и деятельным от всех почитается.
О страшном изменении.
4. Уныние, неудобопреоборимая сущи страсть, ослабляет тело. Ослабляему же телу, ослабляется и душа. Обоим же расслабевшим, изменяют сладострастием растворение телесное. Сладострастие же, движет похотение. Похотение—раждежение. Раждежение—восстание. Восстание движет память. Память—мечтание. Мечтание—прилог. Прилог—сочетание. Сочетание—сосложение. Сосложение же творит деяние или телом, или многообразными прикосновениями. И тако человек побежден быв падает.
О близком изменении.
5. Терпенье во всяком деле рождает мужество; мужество же усердие; усердье же—пождание; пождание—протяжение; протяжение—дела, сиречь приложение утоляет неудержание телесное, и похоти сладострастия укрощает; похотение же движет желание; желание — любовь; любы ревность; ревность—теплоту; теплота—возбуждение; возбуждение—тщание; тщание — молитву; молитва—безмолвие; безмолвье рождает умозрение; умозрение— разум; разум—постижение таинств; конец же таинств — богословие; плод же богословия—совершенная любы; любы же— смирение; смирения—бесстрастие; бесстрастия—прозренье и пророчество, и предуведение. Не бо имать кто совершенныя отсюду добродетели, ниже единою умоляет злобе, но помалу возвращаемей добродетели, помалу и злоба в несущее приходит.
Из 12 гл. Страсть тщеславия не попущает иноку предуспети в добродетели; но труды убо сицевый претерпевает, и в страсти бесплоден обретается.
Гл. 13. Се же навык глаголю, яко кроме добродетелей сих инок никогда же предуспеет, сиречь: пощения, воздержания, бдения, терпения, мужества, безмолвия, молитвы, молчания, плача и смирения. Суть бо добродетели сии раждательни едина другой и хранительни. От часта бо пощения увядаемо желание раждает воздержание; воздержание—бдение; бдение—терпение; терпение—мужество; мужество—безмолвие, безмолвие— молитву; молитва—молчание; молчание—плач; плач—смирение; смирение возобратне плач. И паки вспять дщери матерей како рождают возобратне, обрящеши. Сего убо взаимна другородстводейства, большего в добродетелях несть. Противная же сих, всем суть явленна.
19. Святой Григорий Синаит пишет:
99. Безмолствующему убо первее должно имети, яко основанье, сии пять добродетелей, на нем же и деянье созидати, сиречь: молчанье, воздержанье, бденье, смирение и терпение; деланий же богодухновенных три: псалмопение, молитву и чтение, и рукоделие аще есть немощен.
Предреченныя бо добродетели не точию все прочия в себе обдержат, но и едина другую составляют.
И от утра убо пребывати в памяти Божьей молитвою и безмолвием сердечным, терпеливне молитися час 1–й, потом 2–й чести, 3–й пети, 4–й молитися, 5–й чести, 6–й пети, 7–й молитися, 8–й чести, 9–й пети, 10–й ясти, 11–й спати, еще потребу имать, 12 пети вечерняя. И тако добре проходя дневное поприще, угождает Богу.
Нощное расстояние.
Новоначальных: полночи спать, и полночи бдеть.
Средних: бдети от вечера 1 час, или 2, спать 4 часа, вставать же на утреню, поя и молясь часов 6, даже до утра.
Совершенных: всенощное стояние и бодрствование.
20.
Выписка из главизн Преподобного Исихия, Иерусалимской Церкви Пресвитера, и прочих богодухновенных мужей: —из книги Добротолюбия.
67. Путь к разуму есть бесстрастие и смирение, без них же никто узрит Господа.
68. Непрестанно труждающийся о внутреннем целомудрствует; не точию же сие, но и зрит, и богословствует, и молится. И сие есть, еже глаголет Апостол: духом ходите, и похоти плотские не совершаете. Гл. 5, 16.
69. Духовным путем шествовати не ведущий о страстных помышленьях не творит попеченья и исправленья, но все упражнение имеет плотское, или объядается, или похотствует, или печалится, или гневается и памятозлобствует, и отсюда ум помрачает или безмерный подвиг употребляет и смущает мысль.
Ум же кроме плача очиститеся не может.
Всем убо полезно есть безмолвие и удаление вещей и человек: паче же страстным и немощным.
77. Якоже чувственно вредная зряще, повреждаемся: сице и зряще умом.
21. Из главы Исихия Пресвитера.
2. Великий законоположник Моисей, паче же Дух Святый, показуя непорочность и чистоту, и многовмещение и высокотворность сея добродетели (духовного трезвения), и уча нас, как сие начинати и совершати подобает, внемли себе, глаголет, да не будет слово тайно в сердце твоем беззакония, словом тайным единомысленное представление — именуя вещи некия лукавыя и богоненавистныя, еже и прилогом называют Отцы, приносимым сердцу от диавола, ему же последуют помыслы наши, абие по представлении оного уму, и страстне с оным разглагольствуют.
20. Подобает подвизающемуся внутрь, во всякое мгновение времени имети четыре сия: смирение, крайнее внимание, противоречие и молитву. Смирение, яко с гордыми бесами противными имеет оно брань, да помощь Христову в руце сердца имать; зане Господь гордых ненавидит. Внимание же, да присно сердце свое творит ни единого помысла имети, аще бы и благ являлся, противоречие же, да егда скоро уразумеет пришедшего, абие со гневом противословит лукавому. И отвещаю, глаголет, поношающим ми злая. Не Богу ли повинется душа моя? (Пс. 118, 42, и 61, 2) Молитву же по противоречию абие да возопиет ко Христу с воздыханием безмолвным. И тогда сам подвизаяйся узрит врага разрушающася, или прогоняема поклоняемым именем—Иисус, яко прах от ветра, или яко дым исчезающий с мечтанием его.
22. Рече никто от Святых:
198. Льстивый друг есть плоть, и угождаема паче брань творит. И абие вражду стяжи к телу и брань со чревом.
202. Несть яда, паче яда аспида и василиска; и несть злобы, паче злобы самолюбия. Исчадия же самолюбия, змеи летающия, имевши сии: похвальбы в сердце, самоугодие, чревобесие, блуд, тщеславие, зависть, и верх всем — гордость, яже совлекати весть не человеки точию, но и Ангелы с небес и мраком вместо света облекати.
