Сборник - Типикон
[Смотри] Подобает ведати: Аще в субботу, или в неделю будет навечерие, литургиа златоустова поется: великаго же василиа литургиа поется на самый праздник. Такожде творим и на праздник святых богоявлений. Блюди, яко егда несть субботы, или недели в навечерие, тогда бывает литургиа василиа великаго: а в день праздника Сице же и в праздник богоявлений.
Ведомо же буди: Аще случится рождество христово или богоявление в неделю, воскресно ничтоже поем.
25. (+) еже по плоти рождество Господа бога и спаса нашего Иисуса Христа: И воспоминание избавления церкве и державы российския от нашествия галлов, и с ними двадесяти язык.
При часе 6–м дне, ударяет в великий кампан, и во вся тяжкая: и собравшимся во храм, начинаем вечерню, по обычаю. Диакон глаголет: благослови владыко. иерей: благословено царство отца и сына, и святаго духа: И по амине, предстоятель: царю небесный: трисвятое. и по Отче наш, Господи помилуй, 12. Слава, и ныне: Приидите поклонимся: трижды. псалом, благослови душе моя Господа: Посем диакон глаголет ектению великую. Аще же в субботу вечера, поем: блажен муж: кафисму вечера, поем 1–й антифон. Аще ли ин день, стихологиа не бывает. но по ектении абие поем: Господи воззвах к тебе: на глас 2: иерей же творит проскомидию. таже диакон кадит храм по обычаю. Ликове же поют стихиры праздника, на 8, глас 2. Самогласны: Приидите возрадуемся: Слава, и ныне, глас тойже: Августу единоначальствующу на земли: И бывает вход со евангелием. Свете тихий: Прокимен дне. Аще же в пяток вечера, поем прокимен великий: Кто Бог велий: со стихи его. И чтения праздника, по чину их. Посреди чтения, тропарь со стихи его, поем на оба лика. По скончании же чтения, ектениа малая, и возглас: яко свят еси Боже наш: и по возгласе, трисвятое. Таже прокимен, глас 1: Господь рече ко мне: сын мой еси ты, аз днесь родих тя. Стих: Проси от мене, и дам ти языки достояние твое. Апостол ко евреем, зачало 303: Многочастне и многообразне: Аллилуиа, глас 5: Рече Господь господеви моему: Стих: Жезл силы послет ти Господь от сиона: Стих: Из чрева прежде денницы родих тя: евангелие луки, зачало 5: Изыде повеление от кесаря августа: И по ряду божественная литургиа великаго василиа. [Смотри] За достойно, поем: о тебе радуется: Причастен един: Хвалите Господа с небес: Аллилуиа, трижды. По отпусте же вжигает параекклисиарх свещник, и поставляет его среди церкве. Клирицы же ставше оба лика вкупе, поют возгласно: Тропарь праздника, глас 4: рождество твое Христе Боже наш, возсия мирови свет разума: в нем бо звездам служащии звездою учахуся, тебе кланятися солнцу правды, и тебе ведети с высоты востока: Господи слава тебе.
Слава, и ныне, кондак, глас 3: дева днесь пресущественнаго раждает, и земля вертеп неприступному приносит, ангели с пастырьми славословят, волсви же со звездою путешествуют: нас бо ради родися отроча младо, превечный бог.
И входим в трапезу, и ядим варение со елеем, рыбы же не ядим. Вино же пием, благодаряще Бога.
[Смотри] Вестно буди: Аще случится навечерие Христова рождества в субботу или неделю, пост не бывает, и тропари царских часов со чтениями в субботу и в неделю не поются: но поем часы царския прежде в пяток, по обычаю, якоже указася на ряду. Глаголем же Верую во единаго бога: и псалом 33, благословлю Господа: и отпуст. Литургиа же в той день не бывает: но поем вечерню во свое время. В субботу же и неделю литургиа бывает во свое время златоустаго. По отпущении же снедаем по уломку хлеба, и от вина вкушаем мало, и отходим в келлии своя. При часе же 6–м дне начинаем вечерню. Аще ли в субботу вечера, поем, блажен муж: кафисму всю. Аще ли в неделю вечера. 1–й антифон. Посем на Господи воззвах. поем стихиры на 8, глас 2. Самогласны: Приидите возрадуемся: И прочая. Слава, и ныне, глас тойже: Августу единоначальствующу на земли: Вход со евангелием. Свете тихий: Прокимен дне. Аще в субботу вечера, поем прокимен: Господь воцарися: И чтения по чину их. По скончании чтения трисвятое не поем, но бывает по паремиах ектениа малая, и по возгласе, прокимен, глас 1: Господь рече ко мне: сын мой еси ты: Стих: Проси от мене: Апостол к галатом, зачало 207: По человеку глаголю: Аллилуиа, глас 5: Рече Господь господеви моему: Стих: Жезл силы послет ти господь: Стих: Из чрева прежде денницы родих тя: евангелие матфеа, зачало 53: Подобно есть царствие небесное зерну горушичну: Посем ектениа: Рцем вси: Таже, Сподоби Господи: и, Исполним вечернюю: и возглас. И посем диакон глаголет: Премудрость. Лик: благослови. и прочая по обычаю, и отпуст. По отпусте же вжигаем свещник среди церкве, и ставше оба лика вкупе, поют тропарь праздника. Слава и ныне, кондак. И входим в трапезу и ядим совершенно: рыбы же не ядим, но со древяномаслием, и сочиво обварено, или кутию с медом: испиваем же и вина в славу божию: в неимущих же странах пием пиво. предлагается же и чтение: Поучение кирилла архиепископа иерусалимскаго, емуже начало: якоже убо во Иисуса Христа надеемся: [Смотри] Ведати подобает яко праздник рождества Христова в кий день ни случится, поется повечерие великое сице: о часе 10–м нощи бывает благовест, и потом трезвон во вся кампаны: иерей же со диаконом оболкся творят начало, якоже во вся праздники владычни. Диакон глаголет: благослови владыко. иерей: благословен Бог наш: и кадящу иерею, глаголем повечерие великое от начала: Слава тебе Боже наш, слава тебе. царю небесный: Трисвятое, и прочее. С нами бог: поем с пением. И вместо тропарей обычных: Просвети очи мои: глаголем тропарь праздника. И вместо, Помилуй нас Господи, помилуй нас: глаголем кондак праздника. По Слава в вышних, бывает литиа по обычаю. и поем на литии стихиры самогласны, глас 1: небо и земля днесь: Слава, глас 5: Волсви персидстии: И ныне, глас 6: Ликуют ангели: Таже глаголет иерей молитвы обычныя бдения. И паки вшедше во храм, поем на стиховне стихиры, глас 2: Велие и преславное чудо: Припев: Из чрева прежде денницы: 2, Рече Господь господеви моему: Припеваем же сими припевы и до отдания праздника. Слава, глас 4. Самогласен: Веселися Иерусалиме: И ныне, глас тойже: В вертеп вселился еси: На благословении хлебов тропарь, глас 4: рождество твое Христе Боже наш: трижды. писан в навечерии по литургии. Таже, Буди имя господне: трижды. псалом 33: благословлю Господа: и чтение в толковании, еже от матфеа, слово 4. На Утрени, по шестопсалмии, на Бог господь, тропарь праздника трижды, и обычныя кафисмы. По 1–й кафисме седален праздника, глас 1. Подобен: Гроб твой: Во яслех нас ради: Слава, и ныне, тойже. и чтение в толковом евангелии златоустаго, еже от матфеа, о празднике. По 2–й кафисме седален, глас 3. Подобен: Красоте: Превечнаго: Слава, и ныне, тойже. и чтем в толковом златоустаго. По чтении же даются свещи братиям. По полиелеи седален, глас 4. Подобен: удивися иосиф: Приидите, видим вернии: Слава, и ныне, тойже. И чтем слово григориа богослова, егоже начало: Христос раждается: Степенна, 1–й антифон 4–го гласа. Прокимен, глас тойже: Из чрева прежде денницы: Стих: Рече Господь господеви моему: Всякое дыхание: евангелие матфеа, зачало 2: Иисус христово рождество: По 50–м псалме, вместо молитвами, Слава: Всяческая днесь радости исполняются, Христос родися от девы. И ныне, тойже стих: конец, Христос родися в вифлееме. Помилуй мя Боже: Стихира, глас 6: Слава в вышних богу: Канона два: един перваго гласа: творение кир космы, со ирмосом на 8: Другий кир Иоанна, со ирмосом, на 8 же. Последи ирмосы обою канонов, кийждо лик свой ирмос.
По 3–й песни ипакои, глас 8: Начаток языков, ибо тебе принесе, лежащему младенцу во яслех, звездою волхвы призвавый, яже и ужасаше, не скиптры и престоли, но последняя нищета. что бо хуждшее вертепа? что же смиреншее пелен, в нихже просия божества твоего богатство? Господи слава тебе.
И чтение. По 6–й песни, кондак, глас 3: дева днесь пресущественнаго раждает: писан в навечерии по литургии. И икос, и чтем пролог. На 9–й песни вжигают свещи братия. честнейшую не поем, но поем припев праздника: Величай душе моя: и ирмос: Таинство: Посем 2–й лик поет такожде припев и ирмос: Такожде припевы поют и к тропарем 1–го канона. Посем 1–й лик поет 2–го канона припев, и ирмос: Любити убо нам: И 2–й лик подобне поет такожде припев, и ирмос: и к тропарем 2–го канона такожде припев: и последи на сходе поют припев 1–й и ирмос. таже 2–й припев и ирмос. Светилен праздника трижды. На хвалитех стихиры, глас самогласны, на 4: Веселитеся праведнии: Слава, глас 6: егда время: И ныне, глас вй: Днесь Христос в вифлееме: Славословие великое. По трисвятом тропарь праздника. ектении, и отпуст. и знаменует игумен святым елеем братию от святаго кандила, еже пред праздничною иконою, поющим нам стихиру самогласну праздника, и час 1–й. На 1–м часе, тропарь праздника. По трисвятом кондак праздника, и прочее, и совершенный отпуст. В сей день бывает литургиа порану, труда ради бденнаго. На Литургии: Антифон 1–й: псалом 110, глас 2: Исповемся тебе Господи всем сердцем моим, повем вся чудеса твоя. Припев: молитвами Богородицы, спасе спаси нас. Стих 2–й: В совете правых и сонме, велия дела господня. молитвами Богородицы, спасе спаси нас. Стих 3: Изыскана во всех волях его. молитвами Богородицы, спасе спаси нас. Стих 4: Исповедание и великолепие дело его, и правда его пребывает в век века. молитвами Богородицы, спасе спаси нас. Таже оба лика: Слава, и ныне: молитвами Богородицы: Антифон 2: псалом 111, глас 2: блажен муж бояйся Господа, в заповедех его восхощет зело. Припев: спаси ны сыне Божий, рождейся от девы, поющия ти: аллилуиа. Стих 2: Сильно на земли будет семя его: род правых благословится. спаси ны сыне Божий: Стих 3: Слава и богатство в дому его, и правда его пребывает в век века. спаси ны сыне Божий: Стих 4: Возсия во тьме свет правым, милостив и щедр и праведн. спаси ны сыне Божий: Таже оба лика вкупе: Слава, и ныне: единородный сыне и слове Божий: Антифон 3: псалом 109, глас 4: Рече Господь господеви моему: седи одесную мене. Тропарь: рождество твое Христе Боже наш: Стих 2: Дондеже положу враги твоя подножие ног твоих. Тропарь: рождество твое Христе Боже наш: Стих 3: Жезл силы послет ти Господь от сиона, и господьствуй посреде врагов твоих. рождество твое Христе Боже наш: Стих 4: С тобою начало в день силы твоея, во светлостех святых твоих. рождество твое Христе Боже наш: Входное: Из чрева прежде денницы родих тя, клятся Господь и не раскается: ты иерей во век по чину мелхиседекову. Тропарь высочайшим гласом: рождество твое Христе Боже наш: Слава, и ныне: Кондак: дева днесь: Вместо трисвятаго: елицы во Христа крестистеся: Прокимен, глас 8: Вся земля да поклонится тебе, и поет тебе: Стих: Воскликните господеви вся земля: Апостол к галатом, зачало 209: егда прииде кончина лета: Аллилуиа, Глас 1: небеса поведают славу божию: Стих: День дни отрыгает глагол: евангелие матфеа, зачало 3: Иисусу рождшуся: За достойно, ирмос: Любити убо нам: до отдания. Причастен: Избавление посла Господь людем своим. Аллилуиа: трижды. На трапезе утешение братии великое, и чтем слово златоустаго, емуже начало: Древле убо патриарх: Аще праздник рождества Христова случится быти в среду, или пяток: Разрешаем убо миряне на мясо, монаси на сыр и яица, и ядим убо от рождества Христова по вся дни, до навечерия святаго богоявления.
