Сборник - Библия (на цсл. гражданским шрифтом)

13 О всех бо не верующе ради чародеяний, а ради первенцев истребления, исповедаша людий сынов Божиих быти.

14 Тихому бо молчанию содержащу вся, и нощи во своем течении преполовляющейся,

15 всемогущее слово твое, (Господи,) с небес от престолов царских жесток ратник в средину погибельныя земли сниде.

16 Мечь остр нелицемерное повеление твое носяй, и став исполни вся смерти: и небесе убо касашеся, стояше же на земли.

17 Тогда внезапу привидения убо снов люте смутиша их, страси же наидоша нечаянни,

18 и ин инамо вержен еле жив, еяже ради вины умираше, объявляше:

19 сония бо, смутивше их, сие предвозвестиша: да не ведяще, егоже ради зле страждут, погибнут.

20 Прикоснуся же некогда и праведных искушение смерти, поражение во пустыни бысть множества: но не долго пребысть гнев.

21 Потщався бо муж непорочен предпоборствова, своея службы оружие, молитву и фимиама умилостивление принес, сопротив ста гневу и конец положи бедствованию, показав, яко твой есть раб.

22 Одоле же поражающаго не силою телесною, ниже оружия действием, но словом покори наказующаго, клятвы отцев и заветы воспомянув.

23 Громадами бо уже падшым друг на друга мертвым, посреде став, пресече гнев и раздели к живым путь.

24 На одежди бо подира бе весь мир, и отцев славы на изваянии четырерядоваго камения, и величество твое на диадиме главы его.

25 Сим уступил искореняяй и сих устрашися: бе бо токмо искушение гнева доволно.

Глава 19

1 Нечестивым же до конца без милости ярость найде: предведе бо их и будущая,

2 яко тии отпустившии, еже отити, и со тщанием предпославше их, поженут вслед раскаявшеся:

3 еще бо в руках имеюще рыдания и сетующе над гробами мертвых, ин себе взяша помысл безумия, и ихже моляще изгнаша, сих аки беглецев гоняху.

4 Влечаше бо их к сему концу достойная нужда, и приключшихся забытие вложи, да и прочую к мучением принаполнят казнь:

5 и людие убо твои преславное путьшествие прейдут, они же странну обрящут смерть.

6 Все бо творение во своем ему роде паки свыше преобразовашеся, служащее свойственным твоим повелением, да отроцы твои сохранятся невреждени.

7 Облак осеняяй полк их, и из преждебывшия воды открытие сухия земли явися, и из моря чермнаго путь невозбранен, и поле злачное от волнения зелнаго:

8 имже весь язык пройде, твоею рукою покровени, видяще дивная чудеса.

9 Якоже бо кони насытишася, и яко агнцы взыграшася, хваляще тя, Господи, избавльшаго их:

10 воспомянуша бо еще, яже во обитании их, како убо вместо рождения животных изведе земля скнипы, вместо же рыб изрыгну река множество жаб.

11 Последи же видеша и новое рождение птиц, егда похотением подвигшеся, просиша сладостныя пищи.

12 Во утешение бо взыдоша им от моря крастели: и мучения грешным наидоша, не без бывших знамений силою молний: праведне бо пострадаша за своя злобы,

13 ибо лютейшее ненавидение странных совершиша: инии убо незнаемых не приемляху пришелцев, сии же благодетелей странных порабощаху.

14 И не токмо, но аще кое разсмотрение будет их: зане враждебно приемляху чуждых.

15 Сии же с празднествами приемше приобщившихся уже их обычаем, жесточайшими озлобиша трудами.

16 Побиени же быша и ослеплением, якоже онии при дверех праведника, егда великою обложени тмою, кийждо своих дверий прохода искаше.

17 Сами бо собою стихии пременяемы, якоже в гуслех гласы сличия имя пременяют, всегда храняще звук: еже есть видети от зрака бывших известно.

18 Земная бо в водная прелагахуся, и плавающая прехождаху на землю.

19 Огнь возмогаше в воде вышше своея силы, и вода угашающую силу забы.

20 Пламень вопреки удоботленных животных не вреди плотей в нем ходящих, ниже таяше ледовидный удоботаяй род сладостныя пищи.

21 По всему бо, Господи, возвеличил еси люди твоя и прославил еси, и не презрел еси, во всяцем времени и месте предстояй.

Книга Премудрости Иисуса сына Сирахова

Предисловие

Понеже многая и великая нам чрез закон и пророки и иных последовавших им дана быша, о нихже подобает хвалити израиля наказания и премудрости ради, и яко не токмо сами чтуще должни разумными быти, но да и иностранных возмогут прилежно учащеся пользовати, и глаголюще и пишуще: дед мой иисус множайше себе вдав в чтение закона же и пророков и иных отеческих книг, и в сих доволное искусство стяжав, понудися и сам написати нечто от надлежащих к наказанию и премудрости, да прилежно учащиися, и сих причастницы бывше, много паче успеют в законнем житии.

Будите убо умоленни, да со благоволением и вниманием чтете, и прощение подасте, аще в некиих возмнимся недоволни быти во истолковании люботрудно изобретенных речений: не равную бо силу имут та в себе, яже еврейски глаголема суть, егда преведутся на иный язык: не токмо же сия, но и самый закон и пророчества и прочыя книги не малое имеют разнство в себе чтомыя.

В тридесять бо осмем лете при евергете цари пришед во египет и премедлив, обретох немалаго наказания свиток, за нуждейшее вмених сам привнести некое тщание и трудолюбие к преведению тоя книги, многое бдение и искусство привнес в разстоянии времене, к концу приводя книгу издати, и в преселении хотящым учитися, предуготовляющым нравы законно жителствовати.

Глава 1

1 Всяка премудрость от Господа и с ним есть во век.

2 Песка морскаго, и капли дождевныя, и дни века кто изочтет?

3 Высоту небесе и широту земли, и бездну и премудрость кто изследит?

4 Прежде всех создася премудрость, и разум мудрости от века.

5 Источник премудрости слово Божие в вышних, и шествия ея заповеди вечныя.

6 Корень премудрости кому открыся? и коварства ея кто разуме?

7 Един есть премудр, страшен зело, седяй на престоле своем, Господь.

8 Сам созда ю, и виде, и сочте ю,

9 и излия ю на вся дела своя,

10 со всякою плотию по даянию своему, и дарова ю любящым его.

11 Страх Господень слава и похвала, и веселие и венец радости.

12 Страх Господень возвеселит сердце и даст веселие и радость и долгоденствие.

13 Боящемуся Господа благо будет на последок, и в день скончания своего обрящет благодать. Страх Господень дар от Господа и на стезях любления поставляет.

14 Любление Господа преславная премудрость, и имже является, разделяет себе в ведение его.

15 Начало премудрости боятися Господа, и с верными в ложеснех создася им: с человеки основание века угнезди и с семенем их уверится.

16 Исполнение премудрости еже боятися Господа, и упоит их от плодов ея:

17 весь дом их исполнит желаний своих и сосуды от жит ея.

18 Венец мудрости страх Господень, возцветаяй мир и здравие изцеления: обоя же суть дары Божии, и разширяет веселие любящым его.

19 И виде и сочте ю: художество и ведение разума одожди, и славу держащих ю вознесе.

20 Корень премудрости еже боятися Господа, и ветви ея долгоденствие.

21 Страх Господень отреяет грехи: пребываяй же в нем отвращает гнев.

22 Не может ярость неправедная оправдитися: устремление бо ярости его падение ему.

23 До времене стерпит долготерпеливый, и последи воздаст ему веселие:

24 до времене скрыет словеса своя, и устне верных исповедят разум его.

25 В сокровищих премудрости притча ведения: мерзость же грешнику Богочестие.

26 Возжелев премудрости, соблюди заповеди, и Господь подаст ю тебе:

27 премудрость бо и наказание страх Господень, и благоволение его вера и кротость.

28 Не сумневайся о страсе Господни и не приступи к нему сердцем раздвоеным.

29 Не лицемерствуй пред усты человеческими и устнам твоим вонми.

30 Не возносися, да не падеши и наведеши души твоей безчестие, и открыет Господь тайная твоя и посреде сонма низложит тя: яко не приступил еси во истине ко страху Господню, и сердце твое исполнено лукавства.

Глава 2

1 Чадо, аще приступаеши работати Господеви Богу, уготови душу твою во искушение:

2 управи сердце твое и потерпи, и не скор буди во время наведения:

3 прилепися ему и не отступи, да возрастеши на последок твой.

4 Все елико аще нанесено ти будет, приими и во изменении смирения твоего долготерпи:

5 яко во огни искушается злато, и человецы приятни в пещи смирения.

6 Веруй ему, и заступит тя, и управи пути твоя и уповай нань.

7 Боящиися Господа, пождите милости его и не уклонитеся, да не падете.

8 Боящиися Господа, веруйте ему, и не имать отпасти мзда ваша.

9 Боящиися Господа, надейтеся на благая и на веселие века и милости.

10 Воззрите на древния роды и видите, кто верова Господеви и постыдеся? или кто пребысть во страсе его и оставися? или кто призва его, и презре и?