Никон - ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы
Церковное богатство убогих богатство Святое Писание именует, и подобает раздавати его убогим. Аще бо инем требующим раздавати церковнии властели должни суть, якоже пишет, колми паче сущыя под ними причетники миловати и даяти им потребная должни суть. Сего же (л. 216) не творящии да отлучатся, пребывающии же неисправлени да извергутся, понеже сами быша братоубийцы, ибо, не имея потребных на составление живота, умирает, аще убо и не умре он, от инуду Божественому промышлению, даровавшу ему потребная животу.
ВОПРОС, ГЛАВА 21
И естли архиереи и боляре, которые не бьют челом и не приводят к тому Царя, чтоб учинил в том деле совершенной указ и исправление, имеют грех, потому что не дают совету чтоб было лутче.
Ответ
Велми согрешают и зело, потому что не разсуждают добраго общаго дела, толко оставляют Церковь во смирении, когда мощно бы им отверсти такой позор, и так не показуют ревность и любовь к такому великому патриаршескому чину, и в том показуются непохвалны для того, кто возможет добро творити, а не творит, тот не похваляется ради нерадения ленности. Все мы на Страстной недели ради спасительныя страсти Избавителя нашего, все есмы кручинны и слезны, показываючи явным лицем внутренную печаль. Супротивно во святое Воскресение во светлые ризы облачимся и веселимся, и кто б на тот день не возвеселился с Церковию Божиею, того сущим християнином не почитаем, для того что не радуется с Невестою Христовою, которая изнова увидела возлюбленнаго Мужа Своего Христа, для того вся наша кручина есть для вдовства и разлучения Церкви Божией. Радость бы наша была вся, естли бы зложила платье печали Церковь Божия Матка наша и облеклася во светлое и белое платье; овдовел есть престол патриаршеский, потому что один как отрекание учинил почитается за мертваго человека, убо желает имети мужа своего что потом и доколе будет жить в печали, и доколе в том платье слезном безутешна будет. Муж, который оставляет жену свою чрез четыре лета, и никакова радения об ней не имеет и харчем ей не промышляет, поизволяет право чтоб инаго мужа была жена и како жене может взять инаго мужа Церковь Божия, когда Никон что живой погребен, никакова радения об Ней не имеет, ни Ее почитает. А вы, архиереи, когда не имеете радения о обирании патриаршеском, кто же иной порадеет, чините что имеете чинить, ваше то дело и ваше радение то. Пастыри, для какой притчи не бережете престола патриаршескаго, который есть обща паства, оберегайтеся чтоб та ваша непрележность Бога не возбудила до отмщения и ярости. Глаголет Захария: а то вижу серп летающ длиною 20 лакот, шириною 10 лакот [804]. Се что добро и что красно во еже жити братии вкупе [805]. Ничто инаго нет чисто лутчаго, как совет и совокупление любви братцкой. Для чево вы друг другу тягости не носите, ни обще воспомогаете себе, заповедь имеем от Бога: возлюби ближняго своего яко самаго себе; всех християн, как одной есте веры не имеете возлюбити друг друга, а наипаче свой народ и сродники имеете возлюбить. И естли вы сами о своем добре и чести не радеете, кто иностранной будет радеть.
РАЗОРЕНИЕ 21-му ВОПРОСУ И ОТВЕТУ
Ты глаголеши, совопросниче, есть ли архиерей и бояре, которые не бьют челом и не приводят к тому царя, чтоб учинил в том деле, совершенной и исправление имеют грех, потому что не дают совету, чтоб было лутчи.
Почто, оставя свет, ко тме отходиши, оставя святыя евангельския заповеди и святых (л. 216 об.) [806] апостол и святых отец правила.
Господу глаголющу: Что [807] же зовете Мя Господи, Господи, и не твористе, яже Аз глаголю.
Всякому [808] слышащему слово Царьствия и не внимающу, приходит лукавый и восхищает сеянное в сердцы его. И прочая. Блюдитеся [809], како опасно ходите, не яко не мудри, но яко премудри, искупующе время, яко дние зли лукави суть. Сего ради не бывайте безумни, но разумевающе, что есть воляю Божия святая и угодная. Бога исповедают, делы же Его отмещутся, мерзцы суще и непокоривии и на всяко дело неискусни.
Яко [810] о неключаемых кому не достоит испытовал. И по хлебе тогда вниде (л. 217) [811] в он сатана, глагола ему Иисус: Еже твориши, твори вскоре. Сего же никтоже не разуме от возлежащих, к чесому рече ему. Ови [812], убо сошедшися, вопрошаху Его, глаголюще: Господи, аще в лето сие устрояеши царьство Израилево? Рече же к ним: Несть ваше разумети времена и лета, яже Отец положи своею областию.
Собора, иже в Лаодикии, правило 13.
Не избран епископ, иже мирскими человеки избран будет.
Толкование.
Судом и избранием митрополита и сущих во области епископ поставляем бывает епископ. Аще же кто не тако возведен будет на епископство, но мирскими людми избран, не избран есть и не приятен.
(л. 217 об.) [813] Такоже и святаго 7-го Вселенскаго собора правило 3. Ты же, ответотворче, глаголеши, велми согрешают и зело, потому что не разсуждают добраго общаго дела, толко оставляют Церковь в смирении, когда мощно было им отверсти такой позор, и так не показуют ревность и любовь к такому великому патриаршескому чину. И в том показуются непохвалны для того, кто возможет добро творити, а не творит, тот не похваляется ради нерадения.
Всем ли ты един ответ твориши, ответотворче, архиереом и бояром, или единым коим, изорцы. И бояром уже реченно есть к сово(л. 218)проснику [814] всем вкупе. Архиереом же власть есть, по благословению святейших влесенских патриарх, по соборному деянию тех, еже есть выше писано, и по грамотам даным запечатаными печатми и за подписанием рук 83-х архиерей. По смерти коегождо патриарха инаго поставляти, якоже и 2-го собора в церкви святых апостол правило 16 утверждает. Ни по которому образу да не взыдет кто на епископию, ея же епископ жив есть. И се жив есмь. Тот умер от жизни вечныя, от ково изшел есмь. Есть же епископское утвержение еже на избрании коегождо их. Собора Карфагенскаго по 18-му правилу (л. 218 об.) [815] и по 2-й главе новых заповедей царя Иустиниана, и градскаго закона грани 28 главы вторыя за подписанием рук тех.
В начале же писания того.
Сие пишу своею рукою и своим разумом, исповедаяся пред Богом и избранными Его ангелы, правую и непорочную нашу христианскую веру, уставленую на 1-м Никейстем и на 2-м Вселенских соборех, еже есть сице. Верую во единаго Бога Отца. И прочая. К сим же приемлю апостолския правила и святых седми Вселенских и поместных соборов, и их же они отвратишася, и аз отвращаюся, еще же (л. 219) [816] и церковный мир исповедаю соблюдати и ни единым нравом противная мудрствовати.
В сем во всем солгали пред Богом и избраными Его ангелы. Обещалися правила святых апостол и святых отец соблюдати и церковный мир, и ничто же соблюдаша. О них же несть времени зде написати. Аще потреба будет, особно речем. Ныне же нужднейшая точию речем. В правилех святых апостол нигде же есть, ни в седми Вселенских соборех написано, еже бы своего митрополита свои епископи судили, нежели патриарха. Четвертаго же Вселенскаго собора 9-е правило не оставляет ни митрополитом митрополита судити (л. 219 об.) [817] развее своего патриарха или Константинополскаго патриарха.
И егда случися нам некоего ради гнева царьскаго дати место гневу, по заповеди Господни писанней: Аще гонят вы во граде сем, бежите во ин град. Якоже и сам Христос Бог наш собою показа образ, в пеленах суще бегал Иродовы злобы, и святии апостоли [818] Петр от темницы и Павел от Дамаска. Якоже пишется в Деяниих святых апостол сице: И якоже бысть стремление языком же июдеом с началники их досадити и камением побити их [819], уведавше же, прибегоста во грады Ликаонския, в Листру и Дервию, и иже во окрестных (л. 220) [820] и ту беста благоденствующе.
О прочих же святых бегающих вселетныя книги прочти памяти их, тамо известно увеси, како бегали и от какия злобы.
Тии же митрополиты и архиепископы обещалися во всем последовати и повиноватися Вселенским святейшим патриархом и по них и нам, отцу своему, еже и по нас бывающим благоволением Божиим святейшим патриархом. И не сотворити им ничто же по нужди ни от царя и великаго князя, ни от бояр или от князей многих, ни от множества народа, аще и смертию воспретят или служити велят или святительское творити в чюжей ми(л. 220 об.)трополии [821] во всех властех кроме епархии, данныя ми отцем моим, или отшедшу ми в которую страну чюжую, не действовати ми священная без позволения отца моего. Еще же и на том обещеваюся, внегда позвати мя отцу моему и всему священному собору, без всякаго слова приходити на собор. Еще же и на том обещеваюся, хотя мя князи держати или бояре или множество народа, не ослушати ми ся повеления отца моего и всясвященнаго собора и еже по них бывающих святейших патриархов. Еще же и на том обещеваюся, не хотети ми приимати инаго патриарха, развее святыя Восточныя (л. 221) [822] церкви греческаго закона по божественным священным апостолским правилом и по святых Вселенских седми соборов. Аще ли же сотворю что тако вышеписанных без повеления и без грамоты или преступлю что едино от сих всех написанных зде, лишен буду сана своего без всякаго слова.
