Никон - ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы
Научи бо нас Спас не убоятися от убивающих тело, души же не могущих убити, но паче боятися научи имущаго власть воврещи в дебрь огненую.
И божественый апостол учит, глаголя: Несть наша брань к крови и плоти, но к началом и ко властем и к миродержителем тмы века сего, к духовом злобы поднебесным. И не имамы (л. 138 об.) [520] зде града пребывающа, но грядущаго взыскуем.
Глаголеши, совопросниче, яко Никон полюбил на пустых местех и безжителных.
Писано есть: Лучши есть един благотворяй, паче тмы законопреступных. Лучши вселятися на пустых местех, по писанному: Се удалихся, бегая, и водворихся в пустыни, чаях Бога спасающаго мя от малодушия и бури. Несть же пусто место благодатию Божиею, но велми многонародно, и ниже наймиты, ниже боярские, но раби Бога вышняго живут.
А яже о отхождении. Писано есть выше и ныне реку, якоже заповеда Господь: Егда [521] убо гонят вы во граде сем, бегите во другий, и научи (л. 139) [522] молитися, глаголя: не введи нас во искушение, но избави нас от лукаваго.
А яже о судии глаголешь, яко аз говорю, егда будет призван истинный судия и праведный, тогда скажу. Ведают вси о нашем отхождении, а еже бы кому судити по правилом, не обрящеши ни правил, ни судии, ни митрополита подобает митрополитом или епископом судити, развее патриарха, якоже вышеписано [523] есть святаго 4-го Вселенскаго собора по 9-му правилу, развее писанаго во Евангелии: Внемлите же от человек, предадят бо вы на сонмы, пред владыки же и цари ведени будете Мене ради во свидетельство им и языком.
Искусом Григорий (л. 139 об.) [524] богословнейший позна, глаголет в 14-м слове в 23-м стихе. Прелюто бо есть и велми тяжко, еже понести гнев царьский. Паче же от християнскаго тягота бе и укор, тягота гонения ради, укор же и досада, яко христианский царь, темже ни озлобляеми во уверение мучению страсти приимаху, ни людие ж в мученичестем чину страждущая имяху, зане царь християн, тем же ни мняху же ся обиды приимати гонимы, но яко злодеем страдати. Увы мне, глаголет Богослов, яко во злых быхом бегати.
Глаголеши ты, расколниче, ответотворче, нигде есть, чтоб архиерей создал град или обоз, токмо монастыри, церкви, (л. 140) [525] книгохранилницы, школы, училища, дела и радения церковная. Грады же и обозы царем и велможам даны созидати. Не видиши ли, но имея уши слыши, яко ни града, ни обоза есть кое любо строение, развее церкви и монастыря и еже подобное нужднейшее монастырю, якоже свидетельствуют вещи места.
Початок же того святаго монастыря не беззаконен, но есть законно несть и по правилом святых отец, яко быти и самому самодержавнейшему царю со всем сигклитом и нам со обретающимися архиереи и прочими священными мужи, архимандриты и игумены на освящении святаго места того.
И есть правило святаго 4-го Вселенскаго собора 24-е: (л. 140 об.) [526] Монастырь [527] с волею епископа поставлен да пребывает не претворен и яже суть к нему имения да будут неотъемлема. Аще же кто инако начнет творити, несть без вины.
Толкование.
Монастыри, иже без благословения и без повеления епископля создани быша, не создани суть, ни освящени. Повелением же и со благословением епископа создании монастыри, яко Божественная места и Богу поручени суще, да пребывают не претворени и не обидими во веки, и мирския жилища николи же да не будут в них. Да сохраняют же имения их и стяжания, села и винограды и вся прочая неотъемлема и неотходна на них. Аще же кто преступит (л. 141) [528] повеление се, от правил запрещению да будут повинни.
И святаго 6-го Вселенскаго собора правило 49.
Елицы [529] же монастыри, повелением епископа своего создани бывше, к тому да не будут мирския жилища и мирским человеком да не отдадутся.
Толкование.
Подобно 24-му правилу Халкидонскаго собора, возбраняет здати монастырь без повеления места того епископа.
И святаго 1-го и 2-го Собора в церкви святых апостол правило 1.
Без повеления епископа никому же достоит монастыря создати, но да весь епископ и молитву сотворит, и созданый монастырь и вся сущая в нем внутренняя и внешняя на хартию да напишутся и да будут под властию (л. 141 об.) [530] епископа, и без воли епископли не подобает ни самому создавшему игуменити в нем, ни игумена поставляти.
Да ты же, ответотворче, глаголешь: Однако же Никону в житии поместья безжительнаго места прилучилось. Не есть безжителен, но множае нежели на Москве патриархия имеет, яко ничто же, но все царьское величество чрез Божественныя законы вышеписаныя зде олихоимствова. И не имеет святая великая церковь никотораго причастия в Москве, якоже прежде при прежних царех и великих князех имела, но есть пуста всякаго перваго своего достояния, яко вдова осиревше.
Да ты же вракаешь, враже всякоя (л. 142) [531] истины, не повинуяся евангелскому учению, еже глаголет: Глаголю [532] же вам, яко всяк глагол празден, иже аще рекут человецы, воздадят о нем слово в день Судный.
Не [533] любяй Мене, словес Моих не соблюдает.
Иже [534] в законе хвалишися, преступлением закона Богу досаждаеши.
Да [535] никто же вас лстит тщими словесы. Сих бо ради грядет гнев Божий на сыны непокоривыя. Елма бо не прияша истину, воеже спастися им. Сего ради посла им Бог действо прелести, воеже веровати им во лжу. Отложше же всяку лжу, глаголите истину.
И 65-е правило святых апостол глаголет.
Аще кто лживое писание нечестивых еретик книги яко святы в церкви (л. 142 об.) [536] пред всеми почитает на пагубу людем и церковному причту, да извержется.
И святаго 6-го Вселенскаго собора правило 19.
Старейшина [537] церковный на всяк день, изряднее же во всякую неделю, да учит люди Божественным повелениям и да сказует не от себе, но якоже божествении отцы достигоша.
Толкование.
Епископи убо во вся дни должни суть учити причет церковный и вся люди своя благоверию и Божественым повелениям. Паче же иных дней во всякую неделю всего причта и народа поучати благочестия словесы, якоже пред речеся: От Божественнаго писания избирающе истинная разумения же и судьбы и не преступати (л. 143) [538] уже положеныя пределы и Богоносных отец предания, но точию от Божественных писаний сказывати и учити истинному разумению Божиих заповедей. А аще кто воспросит их словесе Божественных писаний, да не от своего ума то сказует, но якоже церковнии светилницы и учителие своими писании написаша [539]. То бо им есть благоволно, еже ведети и умети предания Богоносных отец и потом разрешити вопрошаемая, да не како недоумеюще от себе разрешити восхотят таковых и истиннаго сказания далече отпадут.
Видел ли еси, безумный расколниче и преступниче, святых Богоносных (л. 143 об.) [540] отец уставленых вечных предел, како утвержают и развее преданых от святых Богоносных отец Божественных писаний, Божиих заповедей учити или сказовати не велят. А ты от своего ума на соблазн людем Божиим вражиими смехотворными ложными книгами ответы твориши. Писано есть во псалмех: Знаем есть Господь судьбы творяй, в делех руку своею увязе [541] грешник. И по мале. Приседит в ловителстве з богатыми в тайных, еже убити неповиннаго. Очи его на нищаго призирает, ловит в тайне, яко лев во ограде своей, ловит, еже восхитити нищаго [542], внегда привлещи и в сети (л. 144) [543] своей смирит его, преклонится и падет. Внегда ему обладати убогими, рече бо в сердцы своем, забы Бог, отврати лице свое да не видит до конца.
Подобно же уже время рещи да обратится болезнь его на главу тебе самаго скитающагося, остави свое гнездо, яко ворону звати и краситися не своими красотами, но иных птах добротами, еже есть не в своей епархии учити и законополагати и зватися от человек «учителю». И прочая. Чрез святыя священныя правила и вновь от внешних басней толковати и по правилом святым, яко ворону ощипати от всего священнаго сану, которая в чюждем гумне пакостит (л. 144 об.) и, обнажив, пустити пешу ходити, чтоб ея обретаючи иныя птахи, признав ея глупость, тово не делали, а ея, яко врага, носы своими тело ея клевали и кости ея розломали.
ВОПРОС, ГЛАВА 17
Никон говорит, что не обретается вне от своего престола и епархии, толко съехал для некоторых притчей достойных, которые он будет явно говорить, егда будет призван от истиннаго судии и праведнаго.
Ответ
Бысть везде и на всяком месте дано токмо Богу, который ни в котором месте не ограждаетца и не описуетця, для чего на всяком месте есть Его вседержительство, но человеку дано есть на некотором месте быти огражденому и описанному, и на таком именном месте, а не на инем месте; престол Цареградской описуетця толко в одном Цареграде, а не инде где; такожде Иеросалимской в самом Иеросалиме; толко естли прилучилось чрез войны разорение или иныя притчи, тогда мочно на иное место перенесть, как учинилось во Антиохии и во Александрии, которые оба престолы перенесены суть на иныя лутчия и безопасныя места. Ныне милостию Божиею и благодатию Господнею живет и царьствует Москва; чесо ради ты отнимаешь от нея престол и преносишь в монастырь свой? То без ведома особнаго царьскаго величества и без совета всех архиереов и всего освященнаго чину не подобается чинить, для того что ты не сам един глава и самовластел; глаголет убо и правило святых апостол 34-е, что епископи без своих первоначалных и глав их не чинят ничто; однакожде и первый их без совету всех ничесо не чинит для одности. Да и говорит патриарху: чесо ради не поведал тайных притчи своего отъезду, но без совету и докладу толко от себе отстал и пошел, и после отъезду опять чесо ради не известил чрез писание, но оставил речи на долгое время, на 4 годы и болши, чтоб дело в молчании было. Чесо ради сам не изыскивал собору, чтоб очистился и оправдал себе самаго, выговоряя свое учение. Однакоже страшно есть страсть самолюбства и проклята гордость та притчею и родит такие делы, ими же убо он, Никон, чего сам изыскав, и терпети хотя.
