Сборник - Типикон
МРК Подобает ведати, аще случится отдание рождества Богородицы в неделю. В субботу на малей вечерни стихиры воскресны, по обычаю. На стиховне стихира воскресна едина, и праздника стиховна, с припевы своими, великия вечерни: Слава, и ныне, праздника. Тропарь воскресн: Слава, и ныне, праздника. На Велицей Вечерни, по обычной кафисме, на Господи воззвах, стихиры воскресны 3, и анатолиев един: и праздника 6: поемыя на самый праздник. Слава, праздника: И ныне, богородичен первый гласа. На литии стихиры, и Слава, и ныне, праздника. На стиховне стихиры воскресны. Слава, и ныне, праздника. На благословении хлебов тропарь, Богородице Дево: дважды: и праздника, единожды. и чтение в посланиих апостольских. На Утрени, на Бог господь, тропарь воскресн, дважды: Слава, и ныне, праздника. По кафисмах седальны воскресны, с богородичны их. и чтение в толковом евангелии, неделя пред воздвижением. Посем непорочны. И впакои гласа, и чтение, неделя ряд. Степенна, и прокимен гласа. Всякое дыхание: евангелие воскресное. воскресение христово: псалом 50. стихира воскресна, и прочее по обычаю. Канон воскресн со ирмосом на 4, и Богородицы на 2, и праздника оба канона на 8. Катавасиа, крест начертав: По 3–й песни, кондак и икос праздника: и седален праздника, дважды. По 6–й песни, кондак и икос воскресн, и пролог. На 9–й песни поем честнейшую: Светилен воскресн: Слава, и ныне, праздника. На хвалитех стихиры воскресны на 4: и праздника со славным на 4: припевы праздника. Слава, стихира евангельская: И ныне, Преблагословенна еси: Славословие великое. По трисвятом тропарь воскресн точию. ектении, и отпуст, и оглашение студитово. И исхождение обычное в притвор, и час 1–й, и конечный отпуст. На часех, тропарь воскресн: Слава, праздника: И ныне, богородичен часов. По Отче наш, кондак праздника, и воскресн, глаголем пременяюще. На Литургии, блаженна гласа на 6: и праздника песнь 9–я, на 4. По входе, тропарь воскресн, и праздника. Слава, кондак воскресн: И ныне, праздника. Прокимен, апостол, Аллилуиа, и евангелие, недели пред воздвижением, и ряд под зачало. Таже Богородицы. Причастен, Хвалите Господа с небес: другий праздника, Чашу спасения.
13. (:. Память обновлений храма святаго, Христа и бога нашего, воскресния: И предпразднство воздвижения честнаго и животворящаго креста: И святаго священномученка корнилиа сотника. Вечер, обычная кафисма. На Господи воззвах, стихиры на 6: обновления, 3, глас 6, самогласны: и святаго, 3, глас 4. Подобен: Дал еси знамение: Слава, обновления, глас 6, самогласен: Память обновлений. И ныне, предпразднства, глас тойже: Днесь древо явися: [Аще ли в пяток вечера, И ныне, богородичен первый, настоящаго гласа.] Вход. Прокимен дне, чтения 3, обновления: 1–е, царств третиих: Ста соломон: 2–е, Притчей: Бог премудростию: 3–е, Притчей: Премудрость созда себе дом: и ектении. На стиховне стихиры креста, глас 5, подобен: Радуйся живоносный кресте: с припевы их. первый, Возносите Господа бога нашего: вторый, Бог же царь наш прежде века: Слава, обновления, глас 2, самогласен: обновление совершающе, И ныне, предпразднства, глас тойже: божественное сокровище: По трисвятом,
Тропарь обновления, глас 4: якоже вышния тверди благолепие, и нижнюю споказал еси красоту святаго селения славы твоея Господи, утверди сие во век века, и приими наша в нем непрестанно приносимая тебе моления Богородицею, всех животе и воскресение.
Слава, мученка, глас тойже: И нравом причастник: писан сего месяца в 3–й день.
И ныне, предпразднства, глас тойже: Животворящий крест твоея благости, егоже даровал еси нам недостойным Господи, тебе приносим в молитву: спаси императора, и град твой молящийся, Богородицею едине человеколюбче.
И отпуст. На повечерии, по трисвятом кондак обновления. На Утрени, на Бог господь, тропарь обновления, дважды: Слава, святаго: И ныне, предпразднства: и обычныя кафисмы. По 1–й кафисме седален обновления, глас 4, подобен: Скоро предвари: Вся просвети: Слава, и ныне, тойже: и чтение. По 2–й кафисме седален, глас и подобен тойже: Празднственный днесь: Слава, и ныне, тойже: и чтение. Каноны 3: обновления, глас 4, со ирмосом на 6: и предпразднства, глас тойже, на 4: и святаго, глас 5, на 4. Катавасиа, крест начертав: По 3–й песни,
Кондак обновления, глас 4. Подобен: явился еси: Небо многосветлое церковь показася, вся просвещающая верныя. в нейже стояще зовем: сей дом утверди Господи.
И седален, глас 8. Слава, святаго, глас 4: И ныне, предпразднства, глас тойже. По 6–й песни,
Кондак обновления, глас 2. Подобен: Твердыя: обновления духа в сердцах, и просвещение внутренним даруй, верою совершающим священная обновления храма дому твоего, емуже благоволил еси создатися в твое божественное имя, едине во святых прославляемый.
И икос: и пролог. По 9–й песни светилен обновления, подобен: духом: Юже пречистою кровию: Слава, и ныне, Светодательными: На хвалитех стихиры обновления на 6, глас 4, подобен: Дал еси знамение: Днесь божественный и священный: Ины стихиры, глас 1, самогласны: обновляйся, обновляйся: Слава, глас 3, К себе восходи человече: И ныне, предпразднства, глас тойже: Христе Боже наш: Славословие великое. По трисвятом, тропарь обновления: Слава, святаго: И ныне, креста. ектении, и отпуст, и час 1. На 1–м часе, тропарь обновления: Слава, креста: И ныне, богородичен часов. Кондаки на часех пременяюще глаголем. На Литургии, блаженна от канона обновления, песнь 3–я и 6–я. По входе тропарь обновления, и креста, и святаго. Слава, и ныне, кондак обновления. Прокимен, глас 4: Дому твоему подобает святыня Господи в долготу дний. Стих: Господь воцарися, в лепоту облечеся. Апостол ко евреем, зачало 307: святая звания: Аллилуиа, глас 2: основания его на горах святых. Стих: Преславная глаголашася о тебе граде Божий. евангелие матфеа, зачало 67: Прииде Иисус во страны кесарии филипповы: Причастен: Господи возлюбих благолепие дому твоего, и место селения славы твоея. Аллилуиа, трижды.
[Смотри] Ведомо же буди и сие: Аще случится воздвижение честнаго креста в неделю: В субботу же пред воздвижением, На Литургии: Прокимен, и Аллилуиа обновления. един. Субботы же прокимен пред воздвижением оставляется. Апостол, и евангелие прежде обновления, и потом субботы пред воздвижением: Причастен обновления. Рядовый же апостол, и евангелие вычитаем напреди: Недели же пред воздвижением, чтется апостол, и евангелие, в мимошедшую неделю.
МРК Подобает ведати: яко аще случится обновление, 13 день в неделю, оставляется служба святаго корнилиа, и поется, егда разсудит екклисиарх. Поется же воскресна служба со обновлением: и с предпразднством честнаго креста. На малей вечерни, стихиры воскресны, и Богородицы по обычаю. Тропарь воскресн. Слава, и ныне, богородичен. На Велицей Вечерни, блажен муж, кафисма вся. На Господи воззвах, стихиры воскресны, 3: и анатолиев един. И обновления, 3: и креста 3, глас 5: Подобен: Радуйся: писаны на стиховне. Слава, обновления: И ныне, богородичен 1–й гласа. Вход: И чтения 3, обновления. На литии стихира храма: И обновления хвалитныя. глас 1: обновляйся, обновляйся: И гласа 4–го: обновляется днесь: Глас тойже: Посреди земли возносима: Слава, глас 5: Иже в недрех: И ныне, глас 6: Днесь древо явися: На стиховне стихиры воскресны гласа. Слава, глас 2: обновление совершающе: И ныне, креста, глас тойже: божественное сокровище: На благословении хлебов тропарь: Богородице Дево, дважды. И обновления единожды. И чтение в посланиих апостольских. На Утрени, на Бог господь, тропарь воскресн, дважды: Слава, обновления: И ныне, креста. По кафисмах седальны воскресны: Слава, и ныне, обновления. [богородичны же оставляются.] И чтение во евангелии, неделя пред воздвижением. По непорочных впакои: И чтем во евангелии неделю рядовую. Степенны, и прокимен гласа: Всякое дыхание: евангелие воскресное. воскресение христово: и псалом 50. Стихира воскресна. Канон воскресн со ирмосом на 4: Богородицы на 2: обновлению на 4: и креста на 4. Катавасиа: крест начертав: По 3–й песни, кондак и икос обновления: И седален. Слава, и ныне, креста: И чтение. По 6–й песни, кондак воскресн: И икос. И пролог. На 9–й песни, поем честнейшую. Светилен воскресн: Слава, обновления: И ныне, креста. На хвалитех стихиры воскресны, 4: И обновления, глас 4, подобен: Дал еси знамение: две. И самогласны две, глас 3: К себе восходи человече: Другий, Христе Боже наш: Первый припев: Дому твоему подобает святыня Господи в долготу дний. Другий: Господь воцарися, в лепоту облечеся: Слава, стихира евангельская. И ныне, Преблагословенна еси Богородице Дево: Славословие великое. Тропарь воскресн: И ектении. И отпуст: И оглашение. И обычное исхождение в притвор. И час 1–й. На часех, тропарь воскресн. Слава, обновления: И ныне, богородичен часов. По Отче наш, кондак воскресн, и обновления, пременяюще глаголем. На Литургии блаженна воскресна гласа, на 6: И обновления, песнь 3–я, на 4. По входе, тропарь воскресн, и обновления и креста. Кондак воскресн: Слава, и ныне, обновления. Прокимен, апостол, Аллилуиа, и евангелие прежде недели пред воздвижением: И ряд под зачало: таже обновления. Причастен, Хвалите Господа с небес: И обновления.
