Сборник - Типикон
При часе же 4–м дне, ударяет параекклисиарх в малое било. и собравшеся поем час 3, 6, и 9, вкупе, просто, в притворе: На нихже глаголем тропарь и кондак дне триоди. И блаженна, Во царствии твоем: скоро без пения. и Помяни нас Господи: Лик небесный: и прочее. Слава: Лик святых ангел: И ныне: во единаго бога: ослаби, остави: Отче наш: Таже кондак дне триоди, Бездну заключивый: Господи помилуй, 12: и молитва, Всесвятая Троице: Достойно есть, и отпуст.
Во святую и великую субботу вечера:
о часе 10–м дне клеплет в великое: И собравшеся в церковь, облачится иерей и диакон. И благословившу иерею, начинаем вечерню, глаголем: царю небесный: Трисвятое, по Отче наш: Господи помилуй 12. Слава, и ныне: Приидите поклонимся: трижды. псалом, благослови душе моя Господа: Посем ектениа великая. И возглас. Господи воззвах, поем во глас 1. иерей же и диакон отшедше творят проскомидию. И ставим стихов 8, и поем стихиры воскресны 4, глас 1: Вечерния наша молитвы: В тоже время кадит диакон. И триоди самогласны 10, глас 8, на 4: Днесь ад стеня вопиет: дважды. Слава, глас 6: Днешний день тайно: И ныне: богородичен 1: Всемирную славу: Вход со евангелием. Свете тихий: Прокимен не глаголется: По абие иерей, или диакон, Премудрость. И начинает чтец чтения дне триоди по чину их. Всех же чтений, 15. По скончании же чтений, ектениа малая. иерей возглас, яко свят еси Боже наш: Вместо же трисвятаго, поем: елицы во Христа крестистеся: Прокимен, глас 5, Вся земля да поклонится тебе, и поет тебе: Стих: Воскликните господеви вся земля, пойте же имени его: Апостол к римляном, зачало 91: елицы во Христа Иисуса крестихомся: Аллилуиа. и псалом давидов не глаголется, но по еже рещи иерею, Мир ти: И абие чтец глаголет вместо аллилуиа, воскресни Боже, суди земли, яко ты наследиши во всех языцех. глас 6: И людие тойже. И прочее со стихи. И паки последи, воскресни Боже, суди земли: Поему же сему, извлачаются иерее и диакони от одежд, и облачаются в белыя. евангелие матфеа, зачало 115, В вечер субботный: Конец, до скончания века, аминь. И по чину божественная литургиа великаго василиа.
Вместо же херувимския песни поется настоящий тропарь, на глас 8: Да молчит всякая плоть человеча, и да стоит со страхом и трепетом, и ничтоже земное в себе да помышляет: царь бо царствующих, и Господь господьствующих, приходит заклатися, и датися в снедь верным. предходят же сему лицы ангельстии со всяким началом и властию, многоочитии херувими, и шестокрилатии серафими, лица закрывающе, и вопиюще песнь: аллилуиа, Трижды.
За Достойно, Не рыдай мене мати: Причастен: Воста яко спя господь, и воскресе спасаяй нас. аллилуиа, трижды. И дается антидор от иереа: И отпуст. Потом бывает обычное благословение хлебов, и вина. Приходит иерей, покадив их, глаголет обычную молитву благословения: Господи Иисусе Христе Боже наш, благословивый пять хлебов: И рекше: Аминь.
[Смотри] Подобает ведати, Аще ли некия нужды ради великия несть литургии, Поем на Господи воззвах, стихиры на 8: воскресны 3, и анатолиев един, и триоди 3, на 4. Слава, глас 6, Днешний день тайно: И ныне, богородичен 1. Всемирную славу: Вход с кадилом. Свете тихий: Прокимен, Господь воцарися: И чтения дне триоди по чину своему. По скончании же чтений, ектениа, Рцем вси: Таже, Сподоби Господи в вечер сей: Посем, Исполним вечернюю молитву: На стиховне стихиры воскресны, глас 1: страстию твоею Христе: И по алфавиту 3, с припевы их, Господь воцарися: Слава, и ныне, богородичен: Се исполнися исаиино проречение: Таже, Ныне отпущаеши: По трисвятом тропарь, благообразный иосиф: Слава, егда снизшел еси к смерти: И ныне, Мироносицам женам: и отпуст.
[Смотри] Долженствует же екклисиарх имети опасство, да егда скончавается литургиа, будет час 2–й нощи.
По отпусте же исходим из церкве в трапезу, и сядем кийждо на месте своем, с безмолвием и со благоговеинством. И абие входит келарь, и дает братии по единому укруху хлеба: якоже бы просфоры на то уготовлены, в пол литры хлебы, умерены равны, и по 6 смоквей, или фиников, и по единой мерней чаши вина. А идеже вина несть, испивают братия квас от меда, или от жита. Смокви же обретаются на множайших странах. Нам же вкушающим, предложится чтение великое, в деяниих святых апостол от начала: Глаголет же чтец начало, иерей же стих: молитвами святых апостол, Господи Иисусе Христе Боже наш, помилуй нас. и по амине начинает чтец чести.
[Смотри] Ведомо же да есть, яко в завещаниих святых апостол, и инде паки отцы, даже до куроглашения, повелевают оговевати верным. святый же 6–й собор до полунощи повелевает: Типицы же, студийский, иерусалимский, и святыя горы, до конца 3–го часа нощи глаголют совершати службу, и тако ясти, ничтоже ино, но хлеб, и овощие, и мало вин, якоже мню. Сия убо вся мы сочетавше, сущим у нас о Христе братиям предложихом, якоже и предречеся по отеческому уставу, яко да купно, внегда зайдет солнце, клепати, идеже доспеет отпуст.
[Смотри] По вкушении же всея братии, бывает чтение в техже деяниих святых апостол, якоже предречеся. Сие опасство да внимает церквоначальник, Да вся деяния прочтутся до конца. Братиям же всем с прилежанием послушающим, и да не будет леть ни единому же на сон предати себе, боящеся скверны искусителя врага: в таковых бо временех и местех тщится враг осквернити нерадивыя, и многосонливыя монахи. Изменяются же чтецы, и чтут даже до часа 4–го нощи: Посем же вжигает параекклисиарх вся кандила по местом: И взем от настоятеля благословение, и тако изшед ударяет в било. И чтец совершает чтение. И абие благословившу иерею, глаголем трисвятое, и по Отче наш: Господи помилуй, 12. Слава, и ныне: Приидите поклонимся, трижды: псалом 50. Таже поем канон великия субботы, глас 6: Волною морскою: ирмосы по дважды: тропари на 12, со стихами песней. Последи ирмос оба лика вкупе. По 3–й песни, седален: Гроб твой спасе: Слава, и ныне, тойже. И чтется слово святаго епифаниа кипрскаго, егоже начало: Что сие днесь безмолвие много, яко царь спитъ? По 6–й песни, кондак, и икос великия субботы: Бездну заключивый: И чтение от словес златоустаго, в конец толкования евангелиа еже от матфеа: или от Иоанна, слово воскресно. Посем песнь 6, и прочее. По 9–й песни, последи ирмос оба лика вкупе. Таже трисвятое. и по Отче наш: Тропарь, глас 2: егда снизшел еси к смерти: Таже ектениа, Помилуй нас Боже: И отпуст преждеписанный.
Глава 50. Начало с Богом святым, пентикостариа.
сиречь пятьдесятницы, начинаемыя от святыя и великия недели пасхи утра, и ко
нчаемыя даже до недели всех святых, обдержащия неоскудно на всякий день все
последование.
Во святую и великую неделю пасхи:
Об часе утреннем, параекклисиарх взем благословение у настоятеля, исходит, ударяет в великое и клеплет довольно.
И вшед во храм вжигает свещи вся, и кандила: устрояет же сосуды два со углием горящим, и влагает в них фимиама много благовоннаго, и поставляет един сосуд среди церкве, другий же во святом олтаре: яко да исполнится церковь вся благовония. Таже настоятель вшед во святый олтарь со иереи и диаконы облачатся в весь светлейший сан, и раздает свещи братии. И вземлет честный крест: кадило же вземлет диакон: иерей же святое евангелие, ин иерей образ воскресния Христова, и ставятся лицем на запад: И затворят врата церковная, яже к западу. Исходит настоятель со иереи в притвор, северными дверьми, предыдущим пред ним диаконом со двема свещами, и оба лики, поюще стихиру, глас 6: воскресение твое Христе спасе: [Сей стих не обретается ни во едином от уставов, ниже в пентикостариах, еже бы зде певаему быти ему.]
Таже ударяют во вся кампаны и тяжкая, и клеплют довольно. И вшедше в притвор, и станут со евангелием и со образом, лицем на запад, якоже указася прежде. Таже настоятель вземлет у диакона кадило в правую руку, крест же в левую, и кадит образы, и клиросы, и братию, по обычаю. Диакону же предносящу пред ним свещу горящу. Братия же вси стоят держаще свещи своя, со вниманием молящеся в себе, и благодаряще нас ради пострадавшаго, и воскресшаго Христа бога нашего. По скончании же каждения, приходит настоятель пред великия врата церкве, и покадит диакона предстоящаго ему со свещею. Тогда взем кадило диакон от руку настоятеля, и покадит самаго настоятеля. И паки восприим настоятель, кадило став пред церковными дверьми, зря на восток, и назнаменует великия врата церкве, [затворенная суща,] кадилом крестообразно, трижды, держя в левой руце честный крест. И светильником стоящим со обою страну. И возгласит велегласно: Слава святей и единосущней, и животворящей, и нераздельней Троице, всегда ныне и присно, и во веки веков.
И нам отвещающим: Аминь. Начинает настоятель с прочими служители, велегласно настоящий тропарь, во глас 5: Христос воскресе из мертвых, смертию смерть поправ, и сущим во гробех живот даровав. И мы тойже поем подобне, со сладкопением. Поется же сей тропарь трижды от настоятеля, и трижды о нас. Таже настоятель глаголет стихи: 1–й: Да воскреснет бог, и расточатся врази его. И на кийждо стих мы поем тропарь: Христос воскресе: весь по единожды. 2–й стих: яко исчезает дым, да исчезнут. Христос воскресе: единожды. Третий: Тако да погибнут грешницы от лица божия: Христос воскресе: единожды. Четвертый: Сей день, егоже сотвори господь: Христос воскресе: единожды. Слава, Христос воскресе: единожды. И ныне, Христос воскресе: единожды. Таже настоятель поет вышшим гласом: Христос воскресе из мертвых, смертию смерть поправ. И отверзает врата. Входит настоятель с честным крестом, предыдущим ему со двема лампадами: И братиям поющим: И сущим во гробех живот даровав. Таже ударяют во вся кампаны, и клеплют довольно, три звоны. Вшед же настоятель со иереи во святый олтарь: И диакон глаголет ектению великую: Миром господу помолимся. Возглас: яко подобает тебе всякая слава: И начинает предстоятель канон, творение Господина Иоанна дамаскина, глас 1–й. ирмос: воскресния день: ирмосы на 4: тропари же на 12, с припевы, Христос воскресе: И паки последи кийждо лик ирмос. Последи же на сходе катавасиа, ирмос тойже: воскресния день: И но нем, Христос воскресе: трижды. Творит же начало канона на куюждо песнь всегда предстоятель, десной или левой стране случившейся начати. И кадит в начале канона святыя иконы, и оба лики, и братию по чину. И по коейждо песни бывает ектениа малая вне олтаря, якоже рехом, во святый сей день. Возглас внутрь олтаря от иереа: яко твоя держава: По 1–й песни, поет десная страна. По 3–й же поет левая. Сице поем и по прочих песнех. По 3–й песни, возглас: яко ты еси Бог наш:
