Из истории русской иерархии XVI века - архимандрит Макарий (Веретенников)
О святителю Христов! Кая в тебе сокрывается священнотаинства, пишешь бо по любомудреца обычею, везде своя смиренная предлагаеши, поистинне и велика суть нашему смирению тако нарицатися, несть бо достоин брат, ни сын именоватися, но раб исповедаюся святительствовати. Ты бо еси, государь, свет учителем, и язык Божий, и глас небесный, и книжник живота, иже о мне смирением таковая помыслив, благовествуеши. Ей же чести несмь достоин, но и везде, государь, о мне благая проповедуеши и писанми твоими угоднейшими везде меня, чествуя, посещаеши. И о том тебе, пресвятейшему государю отцу своему имярек, Митрополиту всея Русии, много челом бью, что меня, сына своего, безмерно жалуеши не токмо духовне, но и телесне.
Но и о сем, государь, нашему смирению в своем послании возвестил еси, что тебе, государю, отцу нашему, ныне случися в великих попечениих пребывати о царском здравии, и о церковных вещех, и о всенародном благопребывании, и о избавлении языческаго нашествия, к сим же отовсюду утесняем еси стерпемыми болезньми. Мы же, смиреннии, таковая слышав о твоих, государь, святительских великих скорбех и о нестерпимых твоих частых в телеси болезнех, не мало оскорбехомся, но и зело много…[730] не токмо о сем благодарим Всесильнаго Бога, избравшаго тя, Своего угодника в таковый сан святительства великаго архиерейства и вручившаго ти Божия Церкви и паству Христовых словесных овец. Ты же, государь, по евангельскому словеси, поистинне пастырь добрый, не токмо душу свою полагаешь (см.: Ин. 10, 11) за святыя церкви и царя, но и за вся словесныя овца Христова стада православных хрестьян о избавлении языческаго нашествия. Не токмо слышим, государь, про тобя – безпрестанно Всесильнаго Бога молишь и Пресвятую Богородицу и великих чюдотворцов, но и пост со слезами милостынею растворяешь (см.: Пс. 101, 10), а о своих, государь, нестерпимых болезнех, сказывают, ни мало попечение имеешь, но сия вся на Бога возлагаеши, и Пречистую Богородицу, и на молитву великих чюдотворцов, и всех святых. И соединение во всяком деле и слове по евангельскому реченному словеси ото всех требуеши и апостольское слово часто воспоминаеши, егда изнемогаешь, тогда сильнее пребываеши.
О премудрый в человецех и чюдный во святителех и учениче Христов! Поистинне добре путь обрел еси – вся сия на Всесильнаго Бога возложил еси, от Него же сугубу и мзду прияти тщишися. Мы же, твоя смиренная чада, со всеми вашими богомольцы и со всеми соборы по твоему государеву писанью зде ныне безпрестанно Всесильнаго Бога молим и Пречистую Богородицу и великих чюдотворцов о благостоянии святых Божиих Церквей, и о многолетнем здравии, и спасении твоего святительства и сына твоего, святейшаго царя и государя нашего Великаго князя Ивана Васильевича, и о его брате благоверном князе Георгие, и о христолюбивом воинстве, и о всем православном христьянстве, и о устроении земском, и о тишине, и чтобы Господь Бог избавил ото врагов, от бесерменства, и от латынства, и помощь бы и крепость
Свою Господь Бог послал сыну твоему, государю нашему Великому князю Ивану Васильевичу всея Русии самодержцу и всему его христолюбивому воинству на наши враги на бесерменство.
И ты бы, государь, Бога ради и впредь меня сына своего жаловал, в святительских своих молитвах помянул и о своем здравии и спасении своими писанми посещал с своими Богодухновенными поучениями, ты бо еси, государь, Божественному Писанию и человеческому – толковник еси острейши, ты законы человеческия и Божественныя веси отровеннейши; ничто есть, ниже обрестися может в Писании, еже уму твоему ученому сокровенно, ничто на небеси, ниже на земли, еже премудраго твоего разума убежит по данному ти от Бога таланту, но точию, глаголю, магнита камени подражал еси неизреченною некоею нужею, железо привлек еси изваяти им благочестия образы, еже твоей святой души таковое лепо есть, понеже еси Православный Христовы Церкви учитель и свет солнца яснее, мой темный ум всегда мраком неведения омрачен ко осиянию Вечнаго света благодатию призываеши.
И по сих смиренным устом моим молчание налагаю и прощения прошу от твоего великаго святительства и много челом бию и велие благодарение воздаю ти за вся твоя благая. Здрав буди, государь, и спасен, архиерею святый, чрез многие лета, моля Бога за святейшаго царя, сына своего государя, нашего Великаго князя Ивана Васильиевичы всея Русии самодержца, и за всех нас, детей своих, православных хрестиян во веки, аминь».
Повесть о кончине Новгородского архиепископа Феодосия
«О преставлении старца Феодосиа, бывшаго архиепископа Великаго Новаграда и Пскова и о житии его вкратце благослови отче.
Стих: Преиде к вечным обителем Феодосий февраля 26.
Лета 1563 года месяца февраля 26 преставися архиепископ Феодосий в пяток 5-й Недели святаго Великаго поста на память святаго Порфириа епископа Газскаго, пас церковь Премудрости Божиа Софиа 15 лет, а на игуменстве в честнем монастыре Боголепнаго Преображениа Господа Бога и Спаса нашего Исуса
Христа на Футине преже бысть 16 лет, а в монастыри Прениетыя Богородицы в Осифове в своем обещании преже священства и по оставлении престола 20 лет. А всех лет живота его от рожениа и до преставлениа 72 лета. Преставление же его бысть сице, не буди ми лгати на святаго, яко да таго похвалив, сам неключим буду, буди же ми Господи истинну глаголати и писати, понеже аз, непотребный и многогрешный Еуфимие, Божиими судбами сподобихся святым его сединам послужити 12 лет в келье у него и молитвами его сохраняем до преставлениа его к Богу и в гроб скутати честные его мощи и положити, да не на осужение себе реку, да не зазрите ми, братия и отцы, по Лествичникову слову, “видех, – рече, – неразумна ученика о наставничих добродетелех хвалящася и безчестие и срам себе притворяюща, а не хвалу; всем к нему рекшим: и како древо добро ветве без плода испусти”. Аз же воистинну безплоден сый, якоже смоковница безплодная, покааниа плода никако же принесох, но да не продолжу слова, несть бо полезно сквозе ризу лечити и о добродетели старца своего не стяжах, тако же и мудростию покрывати полезное слово.
