Иван Белов - Святая блаженная Матрона Московская - Самая полная книга
Премудрости Соломоновы чтение (глава 3, 1-9)
Праведных души в руце Божией, и не прИкоснется их мука. Непщевани быша во очию безумных умрети, и вменися озлобление исход их, и еже от нас шествие сокрушение, они же суть в мире. Ибо пред лицем человеческим аще и муку приимут, упование их безсмертия исполнено: и, вмале наказани бывше, великими благодетельствовани будут, яко Бог искуси их и обрете их достойны себе. Яко злато в горниле, искуси их и, яко всеплодие жертвенное, прият я. И во время посещения их возсияют и, яко искры по стеблию, потекут. Судят языком и обладают людьми, и воцарится в них Господь во веки. Надеющиися Нань уразумеют истину, и вернии в любви пребудут Ему. Яко благодать и милость в преподобных Его и посещение во избранных Его.
На литии стихиры, глас 7
Времени лютому во отечестве нашем преспевшу, явишася мнози мученицы и исповедницы Христовы. Матрона же, старица блаженная, яко мученица безкровная, изгнания, скитания, уничижения, глад велий и жесток хлад претерпе и верность Господеви даже до часа смертнаго сохрани. Ныне, яко и прежде, нас научает богоугодное и праведное житие на земли являти и присно со Христом быти.
Приходящим к тебе, блаженная старице Матроно, дерзновенно возвещала еси: оскудение веры в людех многия беды несет, сего ради покаяние о гресех пред Господем подобает приносити и молитвы усердныя присно Тому творити, да не гневом Своим с лица земли истребит ны, но, да веру правую исповедующе, велелепно прославим на земли жизнь и щедроты нам Даровавшаго.
Слава, глас тойже
Аще не стоит селение без праведника, не устоит земля Русская, оскудевши благочестием. Сице наставляла еси, праведная Матроно, люди заблуждшия, молящися усердно, да помилует Господь землю Русскую.
И ныне, Богородичен, глас тойже
О Пресвятая Владычице Дево Богородице! Образ Твой, Взыскание погибших именуемый, тщанием Матроны праведныя написася и к пользе верных во храм Успения Твоего принесеся, да вси, взирающе нань, надежду твердую имут на Тя. Взыщи и наша души, Богомати, во мраце греховнем блуждающия, Твоим предстательством и молитвами Матроны блаженныя.
На стиховне стихиры, глас 5.
Подобен: Радуйся
Радуйся, обитель Пречистыя Богородицы, имущи в себе сокровище неистощимое,
честныя мощи блаженныя Матроны. Сия бо, света дневнаго не познавши, духовное же зрение от Бога приемши, даром прозрения и исцеления обогатися, научает ны, грешныя, како подобает спастися и получити в День судный от Господа прощение грехов и велию милость.
Стих: Господь решит окованныя, Господь умудряет слепцы.
Радуйся, избранный сосуде Святаго Духа, Небесная жительнице, немощным человеком помощнице и ко спасению путеводительнице, блаженная старице Матроно. Ты бо, прозирающи грядущая, яко настоящая, многия люди от греховнаго пути обратила еси и ко Христу привела еси. Испроси от Господа и нам, согрешающим, грехов оставление и велию милость.
Стих: Возведох очи мои в горы, отнюдуже приидет помощь моя.
Радуйся, на враги непобедимая воительнице, козни их всегда разрушающая и на жизненнем пути нас укрепляющая, кроткая обличительнице пороков наших. Предстоящи ныне Престолу Царя Небесных воинств, испроси нам, предобрая мати, память твою верно почитающим, прощение грехов и велию милость.
Слава, глас 6
Приидите, прославим песненными хвалы и чистым сердцем блаженную матерь нашу Матрону, яже во дни безбожия и гонения непоколебимый столп благочестия и веры бысть, в немощнем телеси сущи, силу Божия благодати показа и многия люди окрест ея к Богу приведе, к покаянию и молитве о земли Российстей всех призва, и, тако сонм святых Московских исполнивши, явися присная о нас пред Богом печальница и теплая молитвенница.
И ныне, глас тойже
Богородице, Ты еси Лоза истинная, возрастившая нам Плод живота, Тебе молимся: молися, Владычице, со апостолы и праведною Матроною помиловати души наша.
Тропарь, глас 2
Богом умудренную блаженную старицу Матрону, земли Тульския процветение и града Москвы преславное украшение, восхвалим днесь, вернии. Сия бо, света дневнаго не познавши, светом Христовым просветися и даром прозрения и исцеления обогатися. Пресельница же и странница на земли бывши, ныне в чертозех Небесных Престолу Божию предстоит и молится о душах наших.
На утрени
На Бог Господь: тропарь святыя дважды.
Слава, и ныне, Богородичен.
По 1-м стихословии седален, глас 8
Мощи твоя источают всем болящим исцеление, приходящим верою и просящим посещения твоего, мати праведная и досточудная Матроно. Темже твоими молитвами испроси и нам велию милость.
Слава, и ныне, Богородичен
Радуйся, ангелом радость мира приемшая, радуйся, рождшая Творца Твоего и Господа, радуйся, сподобльшаяся быти Мати Божия.
По 2-м стихословии седален, глас 6
Приидите, верных множества, днесь праведную старицу благочестно восхвалим, истинную угодницу Христову, полки бесов отгнавшую, ныне же со ангелы ликовствующую и Христу непрестанно молящуюся, и с любовию той возопиим: не забуди нас, радосте наша, мати блаженная Матроно, восхваляющих и чтущих священную память твою.
Слава, и ныне, Богородичен
Призри на нас, недугующих, Всенепорочная, и исцели болезни наша душевныя, вкупе же и телесныя, да возвеличим Тя, возвеличившую все человечество.
Величание
Величаем тя, святая праведная старице Матроно, и чтим святую память твою, ты бо молиши о нас Христа Бога нашего.
Псалом избранный
Блаженни непорочнии в путь, ходящии в законе Господни. Блаженни испытающии свидения Его, всем сердцем взыщут Его. Благословен еси, Господи, научи мя оправданием Твоим. Вразуми мя, и испытаю закон Твой и сохраню и всем сердцем моим. Глаголах о свидениих Твоих пред цари и не стыдяхся. Боящиися Тебе узрят и возвеселятся, яко на словеса Твоя уповах. Во век, Господи, слово Твое пребывает на Небеси. Жива будет душа моя и восхвалит Тя и судьбы Твои помогут мне.
По полиелеи седален, глас 4
Рука Господня крепце веде тя путем веры, сего ради сквозе терния и волчцы нечестия, на земли нашей обильно прозябшии, неврежденно возшла еси в Небесныя обители, мати Матроно блаженная.
Таже степенна, 1-й антифон 4-го гласа. Прокимен, глас 4: Господи, открый очи мои, и уразумею чудеса от закона Твоего. Стих: Отврати очи мои, еже не видети суеты, в пути Твоем живи мя. Всякое дыхание: Евангелие от Матфея, зачало 104.
По 50-м псалме стихира, глас 6
Святая славная старице Матроно, града Москвы похвало и Руси святыя, молитвеннице, в многоразличных нуждах нам помози, коемуждо полезная дарующи во спасение душ наших.
Канон святыя, глас 8.
Песнь 1
Ирмос: Воду прошед яко сушу, и египетскаго зла избежав, израильтянин вопияше: Избавителю и Богу нашему поим.
Боже Всемилостиве, сподоби ны, недостойныя, воспети угодницу Твою Матрону, нашу изрядную пред Тобою ходатаицу и молитвенницу.
Любовию ко Христу от младенческих пелен уязвилася еси и Тому неленостно в житии Твоем служила еси, мати блаженная.
Избранный сосуд Духа Святаго явилася еси, благодать бо Божию от святыя купели до конца дний твоих присно усердно возгревала еси, мати блаженная.
Богородичен: Архангельски песнь Тебе поем, Чистая: радуйся, Обрадованная, Марие, Мати Христа Бога, присно молящаяся за род наш.
Песнь 3
Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче.
Житием богоугодным и праведным освятилася еси, мати блаженная, темже и нам, с верою к тебе прибегающим, помози благодати Божия исполнитися.
Христа Человеколюбца, Егоже от юности твоея возлюбила еси, мати святая, моли утвердитися нам на камени заповедей Его.
Церкве Зиждитель Господь светообразное чадо церковное содела тя, праведная мати, и в любви Своей утверди тя, яко Человеколюбец.
Ботородичен: Небеси и земли Царице, Богородице Дево, и Церкве Покрове всемощный, утверди обитель сию непоколебимо во благочестии пребывати.
Седален, глас 4
По имени твоему, Матроно блаженная, житие твое бысть, скитания бо, поношения и скорби ни во что же вменивши, госпожа явилася еси не токмо именем, но и духом. Темже и вся потребная Царствия ради Божия стяжала еси и Богом обогатилася еси.
Слава, и ныне, Богородичен
Ныне - радуйся - Тебе зовем, Владычице, грешником погибающим исправление и нам, величающим Тя, спасение.
Песнь 4
Ирмос: Услышах, Господи, смотрения Твоего таинство, разумех дела Твоя и прославих Твое Божество.
Смотрение Божие на тебе особь явлено бе, мати блаженная, яко слепа и немощна телом сущи, даром прозрения и чудес обогатилася еси и венцем нетленным от Господа украсилася
Мудрования плотская презрела еси, блаженная, обаче мудростию, еюже Господь умудряет слепцы, изрядно обогатилася еси.
Яко алавастр мира, облагаухающь пределы Российскии, вемы тя, Матроно праведная, стекаются бо к тебе со всех концев людие земли нашея, заступления просяще.
